بكرة خيط

عارف انت لما حد ييجي يحكيلك قصة ومن اول كلمتين عرفت نهايتها 
طيب عارف لما تتفرج على فيلم ومفروض انك منتظر حاجه كبيرة وفجأة تلائي الفيلم خلص

طيب فاكر بقا لو كان ليك حد قريبك ليه في التريكوه
اهي القصص والحواديت والسيناريوهات دي عاملة زي التريكوه بالظبط
في غرزة كل الناس بتعرف تعملها
وفي ناس بيبدأوا وفجأة يلائي بكرة الصوف خلصت
وساعات بيكملها بلون تاني
وساعات بيقفل على كده ويقلب

وفي اللي عامل حسابه وبيفنش للاخر حلو

بس تعرفوا في ناس كنت بشوفهم وهما بيعملوا غرز غريبة وبيلعبوا بكذا لون في نفس الغرزة

هات بكرة خيط تريكوه وامشي فيها متر لو لقيت لونها اتغير اعرف ان كل شوية هتلائي في جديد
لو لقيت لونها هوه هواه مش محتاج توصل لآخرها عشان تتأكد ان لونها نفس اللون 

بس ده ما يمنعش ان ممكن ايد تتلف في حرير تعمل من لون واحد غرزة ما اتعملش زيها قبل كده وتفضل دايما مميزة

فكك من الالوان....الرك على التقفيل

ايام ما كانت مصر شغلاني

عارفين احساس لما تصحوا من النوم ويبقى مسيطر على عقلكم فكرة واحدة او اغنية واحدة او شئ معين واحد
بيبقى مسيطر بشكل غريب  هو اه مش بيطول بس طول ما هو فى بالك بتسال نفسك هو فى دماغى ليه واول ما يروح تعد مع نفسك تحاول انك تفتكر وتقول هو كان موضوع مهم؟؟
طب كان مفروض اطلع منه بايه؟؟
المهم انا بقالى كتير اوى مسيطر على تفكيرى فكرة غريبة شوية هى فكرة التفكير ليه انا مش مهتم انى افكر ازاى بينما كل اللى يهمنى اللى قدامى بيفكر ازاى وهو بيتعامل فى اى حاجه.هو انا تفكيرى غلط ولا اللى قدامى بيفكر بطريقة اسهل.؟
ليه كل ده؟؟

اوعى تنبهر بشخص وتقول عليه انه بيفكر 
المفكر المشهور اللى كلنا بنقرأ ليه مش هو اللى فكر لا هو اللى خلاك تفكر عشان توصل للفكرة اللى هو عاوز يوصلهالك لكن بتسلسل منطقى عقلك تقبله
بمعنى اننا فى مصر عندنا مشكلة كبيرة جدا وهى اننا مش بنفكر..بنكسل نفكر 
وده لسببين الاول الكسل واننا دايما معتمدين على ناس تفكرلنا والتانى ده جانب تعليمى تربوى مجتمعى سلوكى بيئى وان فى ناس اصلا اتولدت فى بيئة لم يسمح لها بالتفكير او متعلموش ازاى يفكروا وايه الطرق الصحيحة للتفكير
التفكير بيفتح باب  لحاجه مهمة جدا وهى تقبل الاخر
انت عندك وجهة نظرك وصلت ليها بتفكيرك وسلوكك وتربيتك ومجتمعك لو انت واصلها كده فعلا يبقى هتعرف ان عندى وجهة نظر بتفكيرى انا اللى هو مختلف وبسلوكى انا اللى هو مختلف وبالتربية وبالمجتمع وبالتعليم وبالثقافة وبحاجات كتير مختلفة بينا وبين بعض 
وبما ان فى اختلاف فى الطريق اللى احنا مشينا فيه يبقى اكيد كل واحد فينا هيوصل لنقطة
ممكن الاتنين يوصلوا لنفس النقطة وممكن لنقطتين غير بعض
بس بغض النظر ما يقدرش حد ان يقول ايه النقطة الغلط 
لان ببساطة مفيش نقطة غلط 
لان انت لو حكمت هتحكم من وجهة نظرك مش من الوجهة الاخرى
محدش يقولى يعنى اللى اختار حاجه حرام ده يبقى صح ولا غلط
اكيد غلط 
بس ده مش معناه انى لا اعترف بادميته
جزء من اعترافنا بادميتنا هو اعترافنا بامكانية الخطا
وبامكانية الغفران وبامكانية الرجوع عن الخطا وبامكانية الاعتذار
والاهم ان من ادميتنا امكانية القبول
القبول مش معناه انك تعمل زيى او انك متعارضنيش
بس هو انك متمنعيش انى امشى فى طريقى

ولسه بدري أوي 

مارس 2012 

عم كيرشوف

نبدأ حكايتنا سوا ونعرفكم على عم كيرشوف
عم كيرشوف ده كان عالم فيزيا كهربية عمال زاهد حياته عشان يثبتلنا قوانين بمعادلات رياضية نعرف نتعامل بيها بعد كده
سيبكوا من ان نظرياته وقوانينه حلت مشاكل كتير 
بس انا شايف ان قوانينه ممكن نستخدمها في اكترمن كونها ليها علاقة بالدايرة الكهربية بس 
نخش في الموضوع
اي دايرة كهربية بسيطة عبارة عن مصدر للتيار الكهربي اللي بنسميه برده مصدر الجهد
مصدر التيار ده اكيد بيولد تيار اللي هو احنا عاوزينه عشان نشغل بيه الحاجه اللي احنا عاملين الدايرة اصلا عشان نشغلها
المقاومة ودي يا اما بمزاجنا عشان نتحكم في حجم التيار يا مش بمزاجنا والطريق هو اللي بيفرضها علينا

ندخل بقا على انواع التوصيل وده نوعين يا توالي يا توازي
التوالي يبقى انت عاوز كله يشتغل بنفس كمية التيار بس الجهد بيتوزع
التوازي العكس بتثبت الجهد على كله بس كمية التيار اللي داخله في كل حاجه هي اللي بتتوزع

سيبكوا من الكلام النظري اللي لا يودي ولا يجيب
كل واحد مننا عايش جوه دايرة هي مش كهربية اوي بس احنا ممكن نعتبرها كده
عندك مصدر للجهد اللي هو انت اللي هو انت عاوز ايه ومحتاج ايه 
اللي هو دماغك اللي بترتب اولوياتها وتشوف هي محتاجه تركز في ايه

بعد كده بتولد تيار اللي هو التنفيذ الفعلي للافكار والطموح اللي موجود جواك
وفي الاخر تيجي المقاومة اللي هي المعوقات دي بتبقى يا غلطاتك يا ظروف واتوجدت حواليك مش ليك دخل فيها

كل الهري اللي فات ده عشان اقولكوا ان اي حاجه بنعملها في حياتنا ممكن نعملها بطريقتين
يا توازي ودي انك توزع مجهودك الفعلي اللي هو تيارك على كذا حاجه بتعملهم في نفس الوقت بس بنسب متفاوتة
الطريقة دي بتبان اوي لما بتيجي تتكلم في السياسة وازاي انك تحل كذا مشكلة مع بعض في نفس الوقت بفس الخطة...الحل انك تشتغل توازي بس مش تدي كل مشروع كل امكانياتك لا ابدأ واحدة واحدة
ممكن كمان تظهر وانت في يومك عموما بتذاكر وساعات بتبقى مع اصحابك في نفس الوقت وبتقضي واجباتك الاجتماعية وهكذا

في التوالي بقا لازم تكون مرتب ايه هتعمله قبل ايه وايه اول معوق هيقابلك وهتبذل فيه تفكير اد ايه لانك مش هتعرف تحل المقاومة التانية من غير ما تعدي على الاولانية
يمكن الوقت اللي هتبذلوا في تنفيذ الاتنين واحد بس التفكير في حل كل مشكلة لواحدها مش واحد

كلام كتير ملوش اي تلاتة لازمة صدعتكوا على الفاضي معلش

على فكرة
لو مفيش مقاومة في الطريق مش هيحصل فرق جهد وبالتالي مش هيمر تيار

النظرية الفلسفية لتضاريس الكرة البشرية

كلنا طبعا عارفين اننا عايشن بأجسامنا كلنا فوق سطح كرة كبيرة اسمها الكرة الأرضية 
تخيل معايا لو احنا عايشين على السطح الداخلي لكرة تانية 
بس طبيعة السطح الداخلي ده غريبة شوية
السطح الداخلي ده حجمه على اد حجم البشر بالظبط 
ليه تضاريس زي سطح الأرض بالظبط
انت بتتحرك في خطوط في كل الاتجاهات 
كل ما كنت بتتحرك بسرعة كل ما كنت زي البلية اللي بتجري على جوانب السلطانية من غير ما تقع 
مش هتشوف كل تفاصيل التضاريس اللي حواليك بس هتقطع اشواط كبيرة
بيبانلك ساعتها انه املس بس هو في الحقيقة زي القمر ..بيبان املس بس هو مش كده
هو في الحقيقة عبارة عن حفر حزن وجبال فرح

لو اعتبرانا ان السطح ده عبارة عن نقط يبقى كل واحد مننا هيشغل نقطة ومفروض ينقل على اللي بعدها 
مش شرط انه ينقل على اللي عكسها بس لازم هينقل لان في واحد غيره مستني دوره في النقطة دي
 هتفضل تلف جوه الكره لازق في الشطح عمال تتنقل من نقطة لنقطة حزن فرح ,فرح حزن,حزن حزن ,فرح وهكذا
مفيش اي ترتيب منطقي للنقط اللي هتمشي عليها

هتفضل تقطع مشاوير في الكرة دي رايح جاي بس عمرك ما هتعرف تغير اتجاه الخط الا لما تمشي فيه من اقصى قطب لأدنى قطب
أول ما تقطع كل الخطوط الممكنة ومتلاقيش نقطة نقطو ما لمستهاش قبل كده هنا تكون لوصلت لنهاية رحلة حياتك وتقع في بطن الكرة تفضل تتفرج على الناس وهي بتلف من حواليك
من المؤكد اننا هنتقاطع كلنا في كل النقط بس المؤكد اكتر اننا مش هنكون ساعتها في نفس الاتجاه لأن مفيش حياة حد فينا شبه التانية ولا بتبدأ من نفس النقطة

سرعة الدوران وقطع النقط بتختلف من واحد لواحد بس يظل المعدل الكلي واحد
هنلاحظ الموضوع ده أوي لما ييجى مولود جديد
رغم ان معدل انتقاله ما بين لحظات الفرح والحزن بيبقى بطيء جدا لكن سرعة انتقال والديه بين النقط دي بيبقى سريع جدا متأثرين بأي حاجه تحصله 
بيزعلوا من اقل حاجه تحصله وبيطيروا من الفرح لما بيبقى كويس

عدد قمم جبال الفرح اد عدد حفر الحزن بالظبط وما بينهم مطبات هوا تفاؤل وتشؤم واشارات أمل بتنظم عملية الدوران

ما تحاولش تفضل كتير في حفرة واحدة او تاخد وقت عند قمة معينة
لأن اللي جاي وراك مش هيستناك وهيرميك هو ساعتها في بطن الكرة

حاول تزود سرعتك
العبرة هنا مش مين عاش اغلب حياته على جبل او في حفرة
العبرة مين عبر اطول مسافة 
قبل ما ييجي عليه الدور ويبقى في بطن الكرة ويندم انه ضيع حياته على قمة فرح كان فاكرها عالية 
بس في الحقيقة في اعلى منها كتير

سر البطيخة

سيب نفسك لخيالك وتخيل انك قاعد في اوضة مليانة بطيخ

اول حاجه هتلاحظها ان الوانهم مختلفة واحجامهم كمان مختلفة واستحالة اتنين يبقوا متماثلين
ممكن تكون ما بتحبش البطيخ وبالتالي مش هتهتم اوي انك تشوفه من جوه

اما لو كنت بتحبه فهتحتاج تفتحه عشان تشوفه من جوه

البطيخة يا تشقها بسكينة مرة واحدة يا ترميها على الارض بالجامد وغالبا بنستخدم الطريقة الاولى
يعني لو قعدت تحسس عليها من برة من هنا للسنة الجاية هتفتحلك ولا عمرك هتشوفها من جوه من غير ما تشقها

يعني لازم تاخد موقف جاد مع البطيخة موقف جامد سؤال حاد اجابة صريحة

في احتمالات كتير للبطيخة اللي انت اخترت انك تعرفها اقصد تاكلها

يا اما حمرا ومسكرة وزي الفل وتتاكل اكل وكلنا نفسنا فيها كده الصراحة
يا اما قرعة في اللون يعني مش حمرا اوي ومع ذلك طعمها حلو
في الحمرا وتيجي تاكلها بحسن نية تلائيها ماسخة كده
وفي القرعة اللي ما فيهاش ريحة السكر ولا الحلاوة
وفي الضاربة ربنا يبعدنا عنها

وباختلاف البطيخ من بره في شكله وحجمه واختلافه من جوه واحتمالاته يبقى هناك حقيقة واحدة بس
مفيش حد فينا من غير بذر

عصير هرتلة

المرة دي الموضوع صعب جدا ,صعب عليكم لان مش مطلوب منكم تقرأوا كلام لواحد ما وصلش لدرجة نص هاوي مفلس ومصاب بجميع الامراض الاجتماعية وازدواج الشخصية  والزيطان والهرتلة على الريئ وصعب عليا
 اكتر لان الموضوع عامل بالظبط زي اني عمال ادور على الافكار القديمة واخر احداث حصلت وشوية كلام ملوش اي لازمة وعمال اضربهم في الخلاط وكل ما وقف ضرب وادوق الائيها مش مظبوطة مرة فكرة مملحة على شوية كلام مسكر ومرة العكس و المهم ان النفس الحلو عشان اكمل العصير مش موجود .
اد ايه الواحد بيبقى غريب لما بيفقد تناغم البهارات مع بعضها

وكل ده عشان انا بقالي 5 ايام ما كتبتش اي حاجه ولا حتى في فكرة عدت على دماغي حتى لو مش للكتابة
-ثواني ثواني عند هنا ووقف 
يعني كل ده عشان انا مش لائي حاجه اكتبها؟؟ وشاغل دماغكوا ومصدعكوا عشان اشكيلكوا ظروفي واقولوكوا اني زعلان عشان بقيت مفلس ومش لائى حاجه جديدة؟؟

 انا لا محترف ولا هاوي ولا حتى نص هاوي وكمان مش مطلوب مني حاجه معينة او في اي التزام من اي نوع اتجاه الكتابة
-جاوب على ام السؤال 
اكيد لا ..
الموضوع ان من اسبوع كده اخدت قرار عزلة صغيرة كده بهدوء .. مفيش سبب مباشر للعزلة دي غير اني كنت عاوز ارتب ادراجي ودفاتري 
وكان بقالي كتير ما اكتأبتش فقولت امنع البلا قبل وقوعه واشوف ايه الاسباب اللي ممكن تجيب الاكتئاب وننهيها من الاول 
كنت حاسس بسرسوب اكتئاب عمال يتسحب من شباك موارب ومش عارف انهي واحد

كمان انا مقتنع ان عشان تقيم حاجه لازم تكون باصص للموضوع من بره وما تدخلش عواطفك اوي في الموضوع عشان تعرف تحكم كويس
اسبوع العزلة ده بدأ بهدوء جدا محدش يعرف عنه حاجه , احداث كل يوم بتمر ببطء شديد والواحد عمال يشغل باله بأي حاجه تشغل وقته
العزلة ما كانتش عزلة كاملة وكنت في وسط اصحابي
بس ما عملتش حاجات متعود عليها باستمرار
بدأت ما احكمش على مشاعري اتجاه ناس كتير وقولت احط كل نقطة فوق حرفها
بعد ما جبت كل الدرج على الارض وبدأت ارتب من الاول 

ابو العز واحمد ما اتحركوش من الدرج اصل دول خارج اي نطاق تقييم اساسا
وغيرت خطة التصنيف قولت يمكن العيب من عندي مش من عند الناس
الناس اللي بتوحشهم وبتحس الشغف في سؤالهم وهما كمان واحشينك..حاول ما تزعلهومش عشان هتخسر اكتر ما هتكسب
الناس اللي بيوحشوك وانت عارف انك مش فالهم اصلا..ولا تشغل بالك باي حاجه وخد بالك منهم واسال عليهم مش المهم برده انك تبقى مبسوط ابسط نفسك على قد ما تقدر وما تشغل بالك بحد
الناس بتاعت المصلحة ..ايوة يعني اللي عارفاك عشان مصلحة او اللي بتتصل بيك عشان مصلحة ..طالما انك عرفت عنهم كده يا اعملهم مصلحتهم بنفس راضية يا افكني وبلاش اتعشم فيهم كتير 
بلاش تتوقع رد فعل من حد مهما كان قريب او بعيد لان انا انا وهو هو لا عمري هكون هو ولا عمر هو هيكون انا

بلاش تخلي الارقام لغة ترجمة بينك وبين مشاعرك مين اكبر ومين اقل وهكذا
بلاش تستنى حاجه من حد لان الوحيد اللي يقدر يفيدك هو انت بس
حتى لو اخترت حد تحكيله لو اخترت غلط انت اللى هتخسر برده ..ولو اني معنديش اسرار فمش بدقق في الموضوع ده

رتبت الدرج واهم حاجه اني حطيت فواصل مش عشان محدش يتنقل بس عشان كل ما افتح واقفل الدرج ما يتلخبطش غصب عني وانا مش واخد بالي وانا بفتح واقفل
غيرت القفل وكتبت الدخول بالعقل 

بعد الحاجات اكتشفتها في ساعات من اللا شيء وانا عمال اصاحب في الملل واسايس فيه
بس الغريب فعلا ان الافكار مش بتيجي لواحدها لازم عامل حفاز ليها والعامل الحفاز ده هو الناس اللي تعرفهم 
ويمكن اللي انت ما تعرفوش ان احد الاسباب الرئيسية لمعرفتك بيهم هي كونهم محفزين لافكارك بس انت مش عارف
وكونك بعدت مش هيجيلك حاجه الا لو كنت مع حد محفز ليك حتى لو نفسك بس مش في عزلة
صعب تصاحب الملل اوي بس لو عندك هواية هتحل الموضوع ده 
يعني طبعا عشان انا لا بعرف ارسم ولا بعرف اعزف فبهري في اي حاجه بقى وانا اهري وانتوا تصدعوا 
بس بغض النظر عن هريي وعن هواياتي الغير مفيدة زي نفخ البلالين
الواحد استفاد الحمد لله من ناس كتير حواليه

خلصنا الاسبوع ورتبنا افكار كتير كانت تايهة
منها مثلا مشكلة البنات في الاهتمام وازاي بيقيسوا الموضوع ده ودي حاجه بتختلف عند الولد اللي مش بيفرق معاه كتير
وفي مثلا مشكلة الولاد في المواقف اللي انت فيها جمبه ومدى استيعابه للظروف والأعذار دي برده حسابها مختلف اوي عند البنات
في ناس بتحبهم مع انك مش بتكلمهم خالص دي حالة مالها تفسير وما حاولتش ادور جواها خفت لبوظ اي حاجه

بعد اسبوع زي ده وتوهان وسرحان وانشغال دماغ في الفاضي من غير اي شيء مفيد
لازم الريستارت اللذيذ..اللي تفضل دايس فيه على الزرار لحد ما الدماغ تقفل بالعافية وبعد كده تفتح على نضيف
مفيش انضف من انك تفتح على حاجه واحدة
وطبعا ماليش غيره
صاحبي البحر
روحتله ووقفت ادامه وقولتله انا جيتلك يا صاحبي
رد عليا بدفاه في الليل وقالي منا عارف انك هترجعلي اصلك ملكش غير
بتعجبني فيه ثقته في نفسه
بس ده مش اي حاجه ده البحر 

نبدأ بقا فترة الاكتئاب  واحنا مبسوطين ونتدلع على الناس براحتنا 

هي صعبة

هي صعبة
في كل حاجه من غير مبالغة
عنوانها التحدي
اللي يوصلها يبقى ولد
مع انها في كل بلد

وعشان تدخل قلبها لازم تفضي قلبك لها
كل اللي عليك احترامها
وانك تعترف بقوتها

اكبر تجسيد لاحلامك
بتقولك اسرح وانا خدامك
حتى صوتها عمره ما ينفرك لانه حتة من صوتك
حاسة بيك من غير كلامك

يا سلام عليها فيها الدلع والفرفشة
كفاية الضحكة 
ويا سلام لو هزت وسطها
والا رعشة جسمها
والا لما تسيب نفسها

يا سلام عليها في السكون
تعرفك اد ايه انت حنون
ولا انك تعترف ان مقاومة سكاتها جنون


الطاعة الكاملة مكفولة
ثقتها فيك مش محدودة
طول ما انت جمبها
لازم تجرب صدقها
تحب لعبها ورقصها
عمرها ما هتسيبك الا لما انت تنساها
حتى لو سبتها كل يوم هتفكر ترجعلها
وترجع تشد حبال مودتها

صدقوني محدش كتير قابلها
بس فيها كل المعاني اللي مش في حد تاني

اصلها مش اي بنت
دي ماريونت