حاجات تايهة

برغم كل الحاجات اللي كتير منها بقا ذكريات
وبرغم اللي فات
ورغم اللي عايش مع انه مات
لسه عايشين بالمناظر
وكل واحد عامل فيها ناظر
ومفكرين اننا بنتدارى بالكدب رغم انه ظاهر
عايشين بنرمم في ماضي على انا حاضر
حاضر كل علاقتنا بيه النفس
ساقية بتدور وعمالين نهز الجرس
وييجي وقت الحساب نقول مهمومين
هم القلوب على هموم الجبين
ويااه على الحنين
لما يطل بعد ما عدت سنين
وييجي يونسك بنسمة صافية ملهاش مكان غير الخيال
وييجي الشجن يغازلك يقولك لو بس كنا لسه عيال
يمكن كان اتبدل الحال
ويمكن كنا عشنا المحال
بس لسه الدرب صامد صمد الجبال
لا راضي يرجع ولا موقف الترحال

السرحان بين خيال الخطوط وندرة الافكار

مش عارف ليه دايما بتجيلي هواجس ربط امور حسية بحاجات مادية يكون لنا اسهل تخيلها

يعني مثلا كتبت من كام يوم ان الخطوط الفكرية تسير في مستويات متوازية وبالتالي لا تتطابق ولا تتقاطع
جالي صديقي عبده اللي بعتبره حد كبير اوي وقالي لا بتتقاطع

قولت اجيب القصة من اولها
ما تزعلوش لو حسيتوا ان الموضوع اتكرر قبل كده بس لو ركزتوا هتلاقوه مختلف

فكر كل واحد فينا عبارة عن نقطة بتبدأ من يوم ما نتولد النقطة دي ليها معدل تكبر بيه بشكل كروي
بما اننا كلنا عايشين كلنا على كوكب الارض فالزمن ثابت
معدل التضخم في حجم الكرة ده راجع للمواقف اللي اتعردتلها والمواهب اللي اتنمت والاحداث اللي سجلتها حواسك
وبافتراض ان مفيش اتنين بيشوفوا نفس المشهد من نفس المنظور في نفس الوقت
يبقى احنا عندنا مستويات كروية فكرية الزمن بيأثر فيها بمعدل ثابت
يعني الكرات كلها بتكبر مع بعض من حيث الزمن بس مش مع بعض من حيث الادراك

جوه كل كورة في خط ماشي على سطحها الداخلي بيعدي على مواقف عدى بيها عشان يحل مواقف تانية لسه بيعيشها

سرعة الخط بتفرق برده من واحد لواحد نتيجة طبيعة الاحداث نفسها

كده عندنا كرات احجامها مختلفة ولا واحدة اد التانية جوه بعض ...كده وصلنا للتوازي
ولما نمشي خط الفكر في الكور دي هنلاقي انها فعلا ما بتتقاطعش بس بتتوازى وده يفسر ان ممكن اتنين وجهة نظرهم واحدة في موضوع معين

ولو الخطين تقاطعوا عمر ما هيحصل تصادم لان المستويات متوازية اصلا ..يعني ممكن انت وواحد معترضين في نقطة ده نتيجة لحجم الكرة وسرعة الخط..بس في الاخر هتعدي

محدش بيعمل تصادم الا لو عايز

الاتنين المتفاهمين هما الاتنين اللي كل واحد فيهم عارف معدل كبر كرة التاني وسرعة الخط اللي ماشي فيها عشان كده بيتجنب صدامه وبيبقى اكتر واحد قادر يفهم هو عمل كده ليه واتصرف كده ازاي
واي انحراف للخط او تغيير في سرعته ده بيعمل صدمة للتاني لانه ما توقعش كده

لذلك القريبين من بعض اوي زعلهم مهما كان بيعدي بس بيكون اصعب

اهم حاجة والواحد بيتعامل مع حد يعرف حجم الكرة بتاعته بالنسبة للي ادامه

مش عيب لو كان اصغر ومش ميزة لو كان اكبر

العيب بجد انك تاخد حجم غير حجمك او تقفد القدرة على التقييم

كلام معقد انا عارف بس سيبوا خيالكوا يسرح

حوار مع شابٍ يهزي

قالولي بتحبها؟؟
لو على المحبة
فحبي ليها بيزيد حبه حبه

حبه كتير حبه عادية
بس القلب بنفس الدقة

نفس الشوقه لنفس اللهفة

نفس الصداقة والمودة

وساعات بس مش كتير بقول مش عارف
رغم اني حاسس وشايف

اصل الكلام ما بقاش يدوب
وصوتنا علي عن دقات القلوب
والدرب كان واحد وبقا دروب

وساعات بنقفل بالسكوت
حسيت مرة اننا فصلنا البيوت
والمرة التانية حلمت ان القطر بيفوت

قاطعني صاحبي وقالي دي مين
ضحكت أوي وقولتله مصر
مصر اللي بقت بتقفل بعد العصر
وبقت شغالة في هز الخصر
مصر للي بقت شغلانتها الحصر

ما بين الجثث وبين الرتب
وبين الغوازي اللي ماشيين يتشخلعوا ونسونا الترب
وبين القعدة على القهاوي ونسيان الطرب

صاحبي اتفصل قام اتصلب
قال لتالتنا
قوم قبل ما يفتح مأدبة الذنوب
ويفضل يشتغلنا وفي الاخر يتوب
قوم ياللا نمشي ونسيبه للحساب
اصل الفلوس اللي معايا يدوب

تالتنا قالي ارجعلها
ربك عالم بالمكتوم والمكتوب

حياة العزل السياسي

بقالي كتير اوي ما كتبتش انا عارف 
بس كان عندي مشكلة نفسية عقلية عميقة وهي ان كل ما احاول اكتب الئي المشهد السياسي بسيطر عليا وده شيء خنيق اساسا
سياسة ايه وبتاع ايه ومين يحكم ومين ما يحكمش
انا مالي انا ومال الحاجات دي 
انا واحد هلاس بتاع تفسير ترتيب بذر البطيخ وعمال ارسم في لوح ملهاش وجود اصلا

كان نفسي اكتب وقت ما نجحت عن نجاحي ده بس قولت الم الدور بلاش ابقى محدث نعمة لسه شوية 

المهم خدت جانب وقعدت مع اصحابي لحد ما كلمني عبده وقالي اعتزل المشهد
عبده صاحبي ما يعرفش اني عملت حاجات ما عملتهاش قبل كده

نزلت البحر وده في حد ذاته شيء جميل..اهو الواحد يغسل نفسه من الوساخة اللي حواليه
ركبت بيتش باجي واوووه بقا على الجنان واللف في الشوارع ولا كأني رجعت 10 سنين ورا
بحب في حبيبتي اكتر شوية بحاول افسيلها دماغها هي كمان بس الموضوع هياخد وقت

ده اهم كتير اوي من اني اتابع المشهد عن قرب
كنت كل ما اجي اسجل موقفي من اللي بيحصل وامسك النتيجة واجيب التاريخ يوم يوم وسجل رأيي ارجع اقول:
   هو انا هكتب لمين؟؟
هكتب للناس ؟؟ ولا للتاريخ ولا لأولادي؟؟
ولا عشان الناس تعرف نيتي؟؟
ولا خايف؟؟
في الحقيقة رأيي في دماغي
مش مهم خالص مين يعرفه ونيتي اللي هيحاسبني عنها ربنا 
بس وانا بدور في المدونة فرحت الصراحة لان المدونة اصلا اتعملت عشان موضوع شبيه باللي احنا فيه  
http://ahmedyassin1024.blogspot.com/2012/08/blog-post.html
 
 انا عارف اني هلاس ومش هتوصل لحاجة مفيدة من ورايا 
اه على فكرة انا غيرت الاستايل بتاع المدونة وحطيت فيه شوية احمر كده عشان محدش يقول ان معنديش دم
وللا اللي يقول يقول هو الدم اصلا شاحح في السوق


اخر حاجة ممكن اقولها ان شاءء الله هتخرج السنة الجاية
حد من اللي شاغلين دماغنا هيوفرلي شغل؟؟

تاريخ المزبلة

من الأول كده....
لو انت بتزعل من الشتيمة او شوية ألفاظ خارجة بلاش تكمل
ولو انت بتقرف بلاش تكمل برده
ولو انت حساس زيداة عن اللزوم خودلك جانب

نبدأ من عند محمد على ...من وقت محمد على مرورا بالسلاطين اللي بعضه اللي كان اغلبهم عاهات محدش فيهم ادم جديد 
لحد ما نوصل لسنة الاحتلال الانجليزي ...وهنا بداية ونشأة أول مقلب زبالة في مصر
اي نعم كانت زبالة اوروبية يعني نضيفة شوية في العقول بس طبعا كونه احتلال لا يخرجه بأي شكل من الاشكال من بوتقة الخرا

سيبكوا من حركات الرواد الفكر في المرحلة التاريخية دي ..بمعنى ان كمية أدباء ومفكرين ظهروا في الفترة دي مجاش زيهم ..طه حسين-نجيب محفوظ-عباس العقاد اللي معاه ابتدائية-جمال الافغاني-محمد طلعت حرب

برده ده ما منعش تكوين مقالب زبالة في كل حواري مصر
البرنس جمال عبد الناصر وصل للحكم من هنا وهنا بدأ تحويل مصر بالكامل لأكبر كقلب زبالة
60 سنة الظلمة عمالين يكنسوا الشعب ويحطوه فوق بعضه ويكوموه في حفرة
ومحدش يخرج من اللي بيتكنس ده غير صاحب الواسطة او الفلوس
فضلنا نتركن نتركن لحد  ما جت ثورة يناير

اياك تفكر ان ثورة يناير خلتنا ننضف......بالعكس تماما تماما تماما
الثورة خلتنا نفرز الزبالة

كيس الزبالة الكبير اللي كلنا عايشين فيه مليان اكياس زبالة كتير جواه
كل ما في الأمر اننا قررنا اننا نمسك كيس كيس ونطلع النضيف منه او بمعنى اصح اللي لسه سليم ونحاول نستفيد منه

المشكلة بجد حاليا ان في زبالة لا يمكن تستخدمها تاني وعاملة نفسها نضيفة

من وسط كيس زبالة الفلول عدى شفيق وبعيد الهلاهيل زي عمرو موسى اللي من كتر ما سبناهم بقوا بيفتخروا الوقتي انهم فلول واوساخ

ومن وسط كيس زبالة القضاء طلعلنا واحد اسمه الزند مصدق نفسه انه محترم وهو اصلا عفن جوه كيس الفساد اللي هو جاي منه

نيجي بقا لكيس زبالة الشرطة..يعني الخرة كله..يعنى ناس فضلوا فاشخنا في افكارنا حتى بعد الثورة وما اطهرش منهم ضافر وفي الاخر لمجرد توافق المصالح بقوا نضاف كلهم من يوم وليلة...لأ وكمان في الموسوعة الحديثة لكيف تفشخ خيالك مكتوب فيها ان زي ما ثورت عليهم في في يوم عيدهم ونكدت عليهم وخليته عيد ثورتك ..روح اديهم يوم 30 عيد ثورة ليهم..وسلملي على التطهير والحنية

انا مقتنع ان كده كده في نسبة زبالة في البلد مهما كنا دولة محترمة ..وممكن اكون انا منهم
بس في الفترة دي بعد اكتر من 60 سنة زبالة فوق بعضها لازم نستحمل المرض والريحة والقرف عشان نفرز كيس كيس ونطلع منه اللي ينفع

بدأنا بكيس لمجرد ان مكتوب عليه اسلام فكرناه نضيف جاي من الدين وكده
اتاري اسلام ده اسم واحد ساكن في اخر شارع في مصر وهو اصلا ملحد
نضفنا الكيس بعد ما لبسناه طبعا ودلوقتي في مرحلة الطهارة
اصل زي ما قال احد خوازيق الكيس ان السياسة نجاسة
انا احب اقوله ان كنت ترضاها على نفسك فانا ما ارضاهاش
الناس كرهت الاخوان لانها فكرتهم اكتر كيس نضيف..اكبر قوة ..اكبر تجمع..طلع في الاخر كله شبه بعضه 

من الاخر كده ان كان مكتوبلي اعيش وسط الزبالة فانا هعيش ادور على حد نضيف يعيش معايا حتى لو هينضفني

وزي ما ابن العياط كتب اسمه من خره في مزبلة التاريخ
مش هو لواحده اللي زباله


انا رايح استحمى

بكرة خيط

عارف انت لما حد ييجي يحكيلك قصة ومن اول كلمتين عرفت نهايتها 
طيب عارف لما تتفرج على فيلم ومفروض انك منتظر حاجه كبيرة وفجأة تلائي الفيلم خلص

طيب فاكر بقا لو كان ليك حد قريبك ليه في التريكوه
اهي القصص والحواديت والسيناريوهات دي عاملة زي التريكوه بالظبط
في غرزة كل الناس بتعرف تعملها
وفي ناس بيبدأوا وفجأة يلائي بكرة الصوف خلصت
وساعات بيكملها بلون تاني
وساعات بيقفل على كده ويقلب

وفي اللي عامل حسابه وبيفنش للاخر حلو

بس تعرفوا في ناس كنت بشوفهم وهما بيعملوا غرز غريبة وبيلعبوا بكذا لون في نفس الغرزة

هات بكرة خيط تريكوه وامشي فيها متر لو لقيت لونها اتغير اعرف ان كل شوية هتلائي في جديد
لو لقيت لونها هوه هواه مش محتاج توصل لآخرها عشان تتأكد ان لونها نفس اللون 

بس ده ما يمنعش ان ممكن ايد تتلف في حرير تعمل من لون واحد غرزة ما اتعملش زيها قبل كده وتفضل دايما مميزة

فكك من الالوان....الرك على التقفيل

ايام ما كانت مصر شغلاني

عارفين احساس لما تصحوا من النوم ويبقى مسيطر على عقلكم فكرة واحدة او اغنية واحدة او شئ معين واحد
بيبقى مسيطر بشكل غريب  هو اه مش بيطول بس طول ما هو فى بالك بتسال نفسك هو فى دماغى ليه واول ما يروح تعد مع نفسك تحاول انك تفتكر وتقول هو كان موضوع مهم؟؟
طب كان مفروض اطلع منه بايه؟؟
المهم انا بقالى كتير اوى مسيطر على تفكيرى فكرة غريبة شوية هى فكرة التفكير ليه انا مش مهتم انى افكر ازاى بينما كل اللى يهمنى اللى قدامى بيفكر ازاى وهو بيتعامل فى اى حاجه.هو انا تفكيرى غلط ولا اللى قدامى بيفكر بطريقة اسهل.؟
ليه كل ده؟؟

اوعى تنبهر بشخص وتقول عليه انه بيفكر 
المفكر المشهور اللى كلنا بنقرأ ليه مش هو اللى فكر لا هو اللى خلاك تفكر عشان توصل للفكرة اللى هو عاوز يوصلهالك لكن بتسلسل منطقى عقلك تقبله
بمعنى اننا فى مصر عندنا مشكلة كبيرة جدا وهى اننا مش بنفكر..بنكسل نفكر 
وده لسببين الاول الكسل واننا دايما معتمدين على ناس تفكرلنا والتانى ده جانب تعليمى تربوى مجتمعى سلوكى بيئى وان فى ناس اصلا اتولدت فى بيئة لم يسمح لها بالتفكير او متعلموش ازاى يفكروا وايه الطرق الصحيحة للتفكير
التفكير بيفتح باب  لحاجه مهمة جدا وهى تقبل الاخر
انت عندك وجهة نظرك وصلت ليها بتفكيرك وسلوكك وتربيتك ومجتمعك لو انت واصلها كده فعلا يبقى هتعرف ان عندى وجهة نظر بتفكيرى انا اللى هو مختلف وبسلوكى انا اللى هو مختلف وبالتربية وبالمجتمع وبالتعليم وبالثقافة وبحاجات كتير مختلفة بينا وبين بعض 
وبما ان فى اختلاف فى الطريق اللى احنا مشينا فيه يبقى اكيد كل واحد فينا هيوصل لنقطة
ممكن الاتنين يوصلوا لنفس النقطة وممكن لنقطتين غير بعض
بس بغض النظر ما يقدرش حد ان يقول ايه النقطة الغلط 
لان ببساطة مفيش نقطة غلط 
لان انت لو حكمت هتحكم من وجهة نظرك مش من الوجهة الاخرى
محدش يقولى يعنى اللى اختار حاجه حرام ده يبقى صح ولا غلط
اكيد غلط 
بس ده مش معناه انى لا اعترف بادميته
جزء من اعترافنا بادميتنا هو اعترافنا بامكانية الخطا
وبامكانية الغفران وبامكانية الرجوع عن الخطا وبامكانية الاعتذار
والاهم ان من ادميتنا امكانية القبول
القبول مش معناه انك تعمل زيى او انك متعارضنيش
بس هو انك متمنعيش انى امشى فى طريقى

ولسه بدري أوي 

مارس 2012 

عم كيرشوف

نبدأ حكايتنا سوا ونعرفكم على عم كيرشوف
عم كيرشوف ده كان عالم فيزيا كهربية عمال زاهد حياته عشان يثبتلنا قوانين بمعادلات رياضية نعرف نتعامل بيها بعد كده
سيبكوا من ان نظرياته وقوانينه حلت مشاكل كتير 
بس انا شايف ان قوانينه ممكن نستخدمها في اكترمن كونها ليها علاقة بالدايرة الكهربية بس 
نخش في الموضوع
اي دايرة كهربية بسيطة عبارة عن مصدر للتيار الكهربي اللي بنسميه برده مصدر الجهد
مصدر التيار ده اكيد بيولد تيار اللي هو احنا عاوزينه عشان نشغل بيه الحاجه اللي احنا عاملين الدايرة اصلا عشان نشغلها
المقاومة ودي يا اما بمزاجنا عشان نتحكم في حجم التيار يا مش بمزاجنا والطريق هو اللي بيفرضها علينا

ندخل بقا على انواع التوصيل وده نوعين يا توالي يا توازي
التوالي يبقى انت عاوز كله يشتغل بنفس كمية التيار بس الجهد بيتوزع
التوازي العكس بتثبت الجهد على كله بس كمية التيار اللي داخله في كل حاجه هي اللي بتتوزع

سيبكوا من الكلام النظري اللي لا يودي ولا يجيب
كل واحد مننا عايش جوه دايرة هي مش كهربية اوي بس احنا ممكن نعتبرها كده
عندك مصدر للجهد اللي هو انت اللي هو انت عاوز ايه ومحتاج ايه 
اللي هو دماغك اللي بترتب اولوياتها وتشوف هي محتاجه تركز في ايه

بعد كده بتولد تيار اللي هو التنفيذ الفعلي للافكار والطموح اللي موجود جواك
وفي الاخر تيجي المقاومة اللي هي المعوقات دي بتبقى يا غلطاتك يا ظروف واتوجدت حواليك مش ليك دخل فيها

كل الهري اللي فات ده عشان اقولكوا ان اي حاجه بنعملها في حياتنا ممكن نعملها بطريقتين
يا توازي ودي انك توزع مجهودك الفعلي اللي هو تيارك على كذا حاجه بتعملهم في نفس الوقت بس بنسب متفاوتة
الطريقة دي بتبان اوي لما بتيجي تتكلم في السياسة وازاي انك تحل كذا مشكلة مع بعض في نفس الوقت بفس الخطة...الحل انك تشتغل توازي بس مش تدي كل مشروع كل امكانياتك لا ابدأ واحدة واحدة
ممكن كمان تظهر وانت في يومك عموما بتذاكر وساعات بتبقى مع اصحابك في نفس الوقت وبتقضي واجباتك الاجتماعية وهكذا

في التوالي بقا لازم تكون مرتب ايه هتعمله قبل ايه وايه اول معوق هيقابلك وهتبذل فيه تفكير اد ايه لانك مش هتعرف تحل المقاومة التانية من غير ما تعدي على الاولانية
يمكن الوقت اللي هتبذلوا في تنفيذ الاتنين واحد بس التفكير في حل كل مشكلة لواحدها مش واحد

كلام كتير ملوش اي تلاتة لازمة صدعتكوا على الفاضي معلش

على فكرة
لو مفيش مقاومة في الطريق مش هيحصل فرق جهد وبالتالي مش هيمر تيار

النظرية الفلسفية لتضاريس الكرة البشرية

كلنا طبعا عارفين اننا عايشن بأجسامنا كلنا فوق سطح كرة كبيرة اسمها الكرة الأرضية 
تخيل معايا لو احنا عايشين على السطح الداخلي لكرة تانية 
بس طبيعة السطح الداخلي ده غريبة شوية
السطح الداخلي ده حجمه على اد حجم البشر بالظبط 
ليه تضاريس زي سطح الأرض بالظبط
انت بتتحرك في خطوط في كل الاتجاهات 
كل ما كنت بتتحرك بسرعة كل ما كنت زي البلية اللي بتجري على جوانب السلطانية من غير ما تقع 
مش هتشوف كل تفاصيل التضاريس اللي حواليك بس هتقطع اشواط كبيرة
بيبانلك ساعتها انه املس بس هو في الحقيقة زي القمر ..بيبان املس بس هو مش كده
هو في الحقيقة عبارة عن حفر حزن وجبال فرح

لو اعتبرانا ان السطح ده عبارة عن نقط يبقى كل واحد مننا هيشغل نقطة ومفروض ينقل على اللي بعدها 
مش شرط انه ينقل على اللي عكسها بس لازم هينقل لان في واحد غيره مستني دوره في النقطة دي
 هتفضل تلف جوه الكره لازق في الشطح عمال تتنقل من نقطة لنقطة حزن فرح ,فرح حزن,حزن حزن ,فرح وهكذا
مفيش اي ترتيب منطقي للنقط اللي هتمشي عليها

هتفضل تقطع مشاوير في الكرة دي رايح جاي بس عمرك ما هتعرف تغير اتجاه الخط الا لما تمشي فيه من اقصى قطب لأدنى قطب
أول ما تقطع كل الخطوط الممكنة ومتلاقيش نقطة نقطو ما لمستهاش قبل كده هنا تكون لوصلت لنهاية رحلة حياتك وتقع في بطن الكرة تفضل تتفرج على الناس وهي بتلف من حواليك
من المؤكد اننا هنتقاطع كلنا في كل النقط بس المؤكد اكتر اننا مش هنكون ساعتها في نفس الاتجاه لأن مفيش حياة حد فينا شبه التانية ولا بتبدأ من نفس النقطة

سرعة الدوران وقطع النقط بتختلف من واحد لواحد بس يظل المعدل الكلي واحد
هنلاحظ الموضوع ده أوي لما ييجى مولود جديد
رغم ان معدل انتقاله ما بين لحظات الفرح والحزن بيبقى بطيء جدا لكن سرعة انتقال والديه بين النقط دي بيبقى سريع جدا متأثرين بأي حاجه تحصله 
بيزعلوا من اقل حاجه تحصله وبيطيروا من الفرح لما بيبقى كويس

عدد قمم جبال الفرح اد عدد حفر الحزن بالظبط وما بينهم مطبات هوا تفاؤل وتشؤم واشارات أمل بتنظم عملية الدوران

ما تحاولش تفضل كتير في حفرة واحدة او تاخد وقت عند قمة معينة
لأن اللي جاي وراك مش هيستناك وهيرميك هو ساعتها في بطن الكرة

حاول تزود سرعتك
العبرة هنا مش مين عاش اغلب حياته على جبل او في حفرة
العبرة مين عبر اطول مسافة 
قبل ما ييجي عليه الدور ويبقى في بطن الكرة ويندم انه ضيع حياته على قمة فرح كان فاكرها عالية 
بس في الحقيقة في اعلى منها كتير

سر البطيخة

سيب نفسك لخيالك وتخيل انك قاعد في اوضة مليانة بطيخ

اول حاجه هتلاحظها ان الوانهم مختلفة واحجامهم كمان مختلفة واستحالة اتنين يبقوا متماثلين
ممكن تكون ما بتحبش البطيخ وبالتالي مش هتهتم اوي انك تشوفه من جوه

اما لو كنت بتحبه فهتحتاج تفتحه عشان تشوفه من جوه

البطيخة يا تشقها بسكينة مرة واحدة يا ترميها على الارض بالجامد وغالبا بنستخدم الطريقة الاولى
يعني لو قعدت تحسس عليها من برة من هنا للسنة الجاية هتفتحلك ولا عمرك هتشوفها من جوه من غير ما تشقها

يعني لازم تاخد موقف جاد مع البطيخة موقف جامد سؤال حاد اجابة صريحة

في احتمالات كتير للبطيخة اللي انت اخترت انك تعرفها اقصد تاكلها

يا اما حمرا ومسكرة وزي الفل وتتاكل اكل وكلنا نفسنا فيها كده الصراحة
يا اما قرعة في اللون يعني مش حمرا اوي ومع ذلك طعمها حلو
في الحمرا وتيجي تاكلها بحسن نية تلائيها ماسخة كده
وفي القرعة اللي ما فيهاش ريحة السكر ولا الحلاوة
وفي الضاربة ربنا يبعدنا عنها

وباختلاف البطيخ من بره في شكله وحجمه واختلافه من جوه واحتمالاته يبقى هناك حقيقة واحدة بس
مفيش حد فينا من غير بذر

عصير هرتلة

المرة دي الموضوع صعب جدا ,صعب عليكم لان مش مطلوب منكم تقرأوا كلام لواحد ما وصلش لدرجة نص هاوي مفلس ومصاب بجميع الامراض الاجتماعية وازدواج الشخصية  والزيطان والهرتلة على الريئ وصعب عليا
 اكتر لان الموضوع عامل بالظبط زي اني عمال ادور على الافكار القديمة واخر احداث حصلت وشوية كلام ملوش اي لازمة وعمال اضربهم في الخلاط وكل ما وقف ضرب وادوق الائيها مش مظبوطة مرة فكرة مملحة على شوية كلام مسكر ومرة العكس و المهم ان النفس الحلو عشان اكمل العصير مش موجود .
اد ايه الواحد بيبقى غريب لما بيفقد تناغم البهارات مع بعضها

وكل ده عشان انا بقالي 5 ايام ما كتبتش اي حاجه ولا حتى في فكرة عدت على دماغي حتى لو مش للكتابة
-ثواني ثواني عند هنا ووقف 
يعني كل ده عشان انا مش لائي حاجه اكتبها؟؟ وشاغل دماغكوا ومصدعكوا عشان اشكيلكوا ظروفي واقولوكوا اني زعلان عشان بقيت مفلس ومش لائى حاجه جديدة؟؟

 انا لا محترف ولا هاوي ولا حتى نص هاوي وكمان مش مطلوب مني حاجه معينة او في اي التزام من اي نوع اتجاه الكتابة
-جاوب على ام السؤال 
اكيد لا ..
الموضوع ان من اسبوع كده اخدت قرار عزلة صغيرة كده بهدوء .. مفيش سبب مباشر للعزلة دي غير اني كنت عاوز ارتب ادراجي ودفاتري 
وكان بقالي كتير ما اكتأبتش فقولت امنع البلا قبل وقوعه واشوف ايه الاسباب اللي ممكن تجيب الاكتئاب وننهيها من الاول 
كنت حاسس بسرسوب اكتئاب عمال يتسحب من شباك موارب ومش عارف انهي واحد

كمان انا مقتنع ان عشان تقيم حاجه لازم تكون باصص للموضوع من بره وما تدخلش عواطفك اوي في الموضوع عشان تعرف تحكم كويس
اسبوع العزلة ده بدأ بهدوء جدا محدش يعرف عنه حاجه , احداث كل يوم بتمر ببطء شديد والواحد عمال يشغل باله بأي حاجه تشغل وقته
العزلة ما كانتش عزلة كاملة وكنت في وسط اصحابي
بس ما عملتش حاجات متعود عليها باستمرار
بدأت ما احكمش على مشاعري اتجاه ناس كتير وقولت احط كل نقطة فوق حرفها
بعد ما جبت كل الدرج على الارض وبدأت ارتب من الاول 

ابو العز واحمد ما اتحركوش من الدرج اصل دول خارج اي نطاق تقييم اساسا
وغيرت خطة التصنيف قولت يمكن العيب من عندي مش من عند الناس
الناس اللي بتوحشهم وبتحس الشغف في سؤالهم وهما كمان واحشينك..حاول ما تزعلهومش عشان هتخسر اكتر ما هتكسب
الناس اللي بيوحشوك وانت عارف انك مش فالهم اصلا..ولا تشغل بالك باي حاجه وخد بالك منهم واسال عليهم مش المهم برده انك تبقى مبسوط ابسط نفسك على قد ما تقدر وما تشغل بالك بحد
الناس بتاعت المصلحة ..ايوة يعني اللي عارفاك عشان مصلحة او اللي بتتصل بيك عشان مصلحة ..طالما انك عرفت عنهم كده يا اعملهم مصلحتهم بنفس راضية يا افكني وبلاش اتعشم فيهم كتير 
بلاش تتوقع رد فعل من حد مهما كان قريب او بعيد لان انا انا وهو هو لا عمري هكون هو ولا عمر هو هيكون انا

بلاش تخلي الارقام لغة ترجمة بينك وبين مشاعرك مين اكبر ومين اقل وهكذا
بلاش تستنى حاجه من حد لان الوحيد اللي يقدر يفيدك هو انت بس
حتى لو اخترت حد تحكيله لو اخترت غلط انت اللى هتخسر برده ..ولو اني معنديش اسرار فمش بدقق في الموضوع ده

رتبت الدرج واهم حاجه اني حطيت فواصل مش عشان محدش يتنقل بس عشان كل ما افتح واقفل الدرج ما يتلخبطش غصب عني وانا مش واخد بالي وانا بفتح واقفل
غيرت القفل وكتبت الدخول بالعقل 

بعد الحاجات اكتشفتها في ساعات من اللا شيء وانا عمال اصاحب في الملل واسايس فيه
بس الغريب فعلا ان الافكار مش بتيجي لواحدها لازم عامل حفاز ليها والعامل الحفاز ده هو الناس اللي تعرفهم 
ويمكن اللي انت ما تعرفوش ان احد الاسباب الرئيسية لمعرفتك بيهم هي كونهم محفزين لافكارك بس انت مش عارف
وكونك بعدت مش هيجيلك حاجه الا لو كنت مع حد محفز ليك حتى لو نفسك بس مش في عزلة
صعب تصاحب الملل اوي بس لو عندك هواية هتحل الموضوع ده 
يعني طبعا عشان انا لا بعرف ارسم ولا بعرف اعزف فبهري في اي حاجه بقى وانا اهري وانتوا تصدعوا 
بس بغض النظر عن هريي وعن هواياتي الغير مفيدة زي نفخ البلالين
الواحد استفاد الحمد لله من ناس كتير حواليه

خلصنا الاسبوع ورتبنا افكار كتير كانت تايهة
منها مثلا مشكلة البنات في الاهتمام وازاي بيقيسوا الموضوع ده ودي حاجه بتختلف عند الولد اللي مش بيفرق معاه كتير
وفي مثلا مشكلة الولاد في المواقف اللي انت فيها جمبه ومدى استيعابه للظروف والأعذار دي برده حسابها مختلف اوي عند البنات
في ناس بتحبهم مع انك مش بتكلمهم خالص دي حالة مالها تفسير وما حاولتش ادور جواها خفت لبوظ اي حاجه

بعد اسبوع زي ده وتوهان وسرحان وانشغال دماغ في الفاضي من غير اي شيء مفيد
لازم الريستارت اللذيذ..اللي تفضل دايس فيه على الزرار لحد ما الدماغ تقفل بالعافية وبعد كده تفتح على نضيف
مفيش انضف من انك تفتح على حاجه واحدة
وطبعا ماليش غيره
صاحبي البحر
روحتله ووقفت ادامه وقولتله انا جيتلك يا صاحبي
رد عليا بدفاه في الليل وقالي منا عارف انك هترجعلي اصلك ملكش غير
بتعجبني فيه ثقته في نفسه
بس ده مش اي حاجه ده البحر 

نبدأ بقا فترة الاكتئاب  واحنا مبسوطين ونتدلع على الناس براحتنا 

هي صعبة

هي صعبة
في كل حاجه من غير مبالغة
عنوانها التحدي
اللي يوصلها يبقى ولد
مع انها في كل بلد

وعشان تدخل قلبها لازم تفضي قلبك لها
كل اللي عليك احترامها
وانك تعترف بقوتها

اكبر تجسيد لاحلامك
بتقولك اسرح وانا خدامك
حتى صوتها عمره ما ينفرك لانه حتة من صوتك
حاسة بيك من غير كلامك

يا سلام عليها فيها الدلع والفرفشة
كفاية الضحكة 
ويا سلام لو هزت وسطها
والا رعشة جسمها
والا لما تسيب نفسها

يا سلام عليها في السكون
تعرفك اد ايه انت حنون
ولا انك تعترف ان مقاومة سكاتها جنون


الطاعة الكاملة مكفولة
ثقتها فيك مش محدودة
طول ما انت جمبها
لازم تجرب صدقها
تحب لعبها ورقصها
عمرها ما هتسيبك الا لما انت تنساها
حتى لو سبتها كل يوم هتفكر ترجعلها
وترجع تشد حبال مودتها

صدقوني محدش كتير قابلها
بس فيها كل المعاني اللي مش في حد تاني

اصلها مش اي بنت
دي ماريونت

تفاصيل تايهة

تاهت مني التفاصيل و أولها اسمك
ولا عارف فين مكانك ولا منين أجيب عنوانك
تاهت مني صورتك وكمان ملامحك
حتى ابتسامتك اللي كانت ماسحة همك
حتى برائتك في نظرتك
ومن غير ما اسمعك نسيت صوتك

كل ده مش غلطتي ده غلطتك
انتي اللي طولتي بعادك
واستنيت انا كتير معادك
وشغلتي وقتي 
ولا يوم شاركتيني وقتك

انا عارف ان في الحلم كانت زيارتك
وكان كمان من غير ما أقولك
بس ده لقى المنام يعني لا بيدي ولا بيدك
ومن كتر ما طال بعادك خفت احس اني نسيتك

أوعي تفكري اني بعاتبك
دي طريقتي ...
وانتي رافضة تعرفيني طريقتك
يعني لو كنت برسم كنت اكيد رسمتك
ولو كنت بعزف كنت عزفتك
وكتبت نوتة بتوصف كل حتة في جسمك
ولو كان صوتي حلو كنت غنيتك 
ومليت الدنيا غنى وصف لسكوتك

بس انا عجزت اني اوصلك
عارف اني مقصر بس طامع سماحك
يمكن زي ما كنتي في حلمي تسمحيلي اكون في حلمك
واخد وقت من وقتك

حتى لو اليوم ده ما جاش والزمن اخدك
ورغم اني نسيت حاجات كتير كان فيها تفاصيلك
تبقى حقيقة واحدة بس لا يمكن تتنسى

هي وجودك

حكاية لوحة

بعد السلامات
ومن غير أى مقدمات
هحكيلكوا حكاية لعبة
من كتر ما غالية عليا خبيتها زمان في النيش
والنيش طبعا في بيوتنا واقف عليه الف شاويش
ممنوع اللمس وان فكرت تقرب وش هيتعملك فيش

عدت ليالى طويلة ووصلت لسن الشباب
وفي كل سنة كان بيزودا لأوضة النيش باب
وبعد ما طلع الاتاري بطلت اهتم بالالعاب
ولما بزهق كانوا دايما ينصحوني انى أقرا كتاب
طبعا عمري ما مسكته لاني اول ما افتحه كان النوم غلاب

وفجأة افتكرت لعبتي 
دخلت في يوم اتسحب بفتح النيش
مش عارف ليه بتسحب بس هتقولوا ايه للي تفكيره مفيش

لقيتها واقفة
لعبتي اسمى معاني البراءة فى الحياة
لعبتي اللي مهما زعلت كانت بتبسطنى
دي الحاجه اللى عادي نفسك تتكسر ولا انها فى يوم تنكسر
لعبتي اللى اكتر صاحب ليا عمره ما قضى معايا ادها

في الفترة اللى بعدت فيها عن لعبتي حبيت اللوح
كان نفسي في لوحة مرسومالى على شط هادى
ساعة الشروق ساعة ميلاد الامل

كان في بنت حلوة في خيالى دايما بتكمل المشهد
ياما  اختلفت على مكانها
ما بين هى اللي ترسمني وما بين وجودها في المشهد
فنجان قهوتى محطوط جمبي وانا واقف ساند على المسند

عارف ان حلم اللوحة بعيد
يمكن مش اوي يعنى بس البنت الحلوة اكيد ابعد

هو تقريبا نفس البعد لكونى على الكمان العب 

وبعيدا عن عالم الاحلام 
اخدت قرار وبكل اهتمام
قولت اجمع بين الاتنين
اللعبة واللوحة
واهم حاجة الاواني ما تكونش مجروحة
وقهوتي مش هتنازل عنها جمبى وزى ما هي مظبوطة

هتبقى حاجه للذكرى 
حاجه تجمع بين شبابي وطفولتي
حاجه كل ما المحها امسح بيها همي
يمكن لما حد يشوفها يدعيلي بعد ما يطير دمي
وكالعادة نسيت اهم حاجه حاجه
ما بعرفش ارسم..طب مين هيرسمني

مجنون رسمي (حوار)

- عارف انك تعبان يا عم احمد
* لا يا عم لا تعبان ولا حاجه ,ازاى هكون تعبان وانت معايا
- ساعات بحس انك راضي عني وساعات بحس انك منفضلى
* لا طبعا....انا اللى اهم حاجه عندى انك تكون راضي عني
- يعنى مش عاوز حد معايا؟؟ يمكن اكون مش كفاية
* لا كفاية و100 فل وعشرة ما تشغلش بالك
- بتحبها؟
* هي مين دي؟
- أي حد
* لا..حاليا مش عارف اركز معاني الحب فى حد معين
  بقيت بخاف انى انشغل عن حد اعرفه لمجرد ان واحدة اخدت اوضة في قلبي
- بس أكيد في يوم هتحتاج حد تتسند عليه
* عارف....بس انت معايا اهو
- انا معاك بس مقدرش اساعدك
 تشورني,تشاغلنى,تناكف فيا واناكف فيك
 لكن افرض بعدت وكل واحد من اللي حواليك انشغل , مين هيسأل عليك؟
افرض تعبت..مين هيناولك الدوا؟
* دي حاجات ربنا كاتبها مش بايدنا..وبعدين مين عالم ما يمكن ما اتعبش واموت مرة واحدة
 انت عارف اني ما بحسبش الحاجات دي كده
- انت عنيد ومقرف
* زيك بالظبط
*  طيب هو انا متقل عليك؟
- لا خالص..مش قصدي تفهم كده بس مهما اتفقنا ومهما اختلفنا هنفضل انا وانت واحد
 وفي يوم هنحتاج اللي يشيلنا احنا الاتنين
* قولتلك بلاش الكلام اللي يدل على الضعف ده وبعدين ربنا ما بينساش حد
- بس قالك خد بالأسباب
* ايوة يعني المفروض اعمل ايه؟
- ما تقفلش الباب خالص كده
 سيبه موارب وسيب احتمال لو 1%
* انت عارف اني دايما سايب احتمال
 وبعدين انا ليه حاسس انك بدأت تسمع من أمي اكتر ما بتسمع مني
- هههه لا مش أوى كده وبعدين مامتك ساعات بتتكلم صح واكيد ما تتمنالكش حاجه وحشة
* انا عارف طبعا ..بس دايما عندها مشكلة في التوقيت وطريقة الصياغة
- اتفلسف يا حيلتها 
* مش بقولك بقيت زيها..وبعدين مش نخلص الكلية أول والدراسة وبعدين نتكلم 
- انت بتهزر ..ما انت اللى عاجبك الحوار وبتهرب من أى مسؤولية
* واضح فعلا انى بهرب من المسؤولية..اومال لو ما كنتش شاهد معايا على ايام الشغل والبهدلة اللى فات منها 5 سنين وكنت انا وانت في قمة الملل
- فكرتني ليه؟؟
* ما انت اللي قولت بتهرب من المسؤولية 
- مشكلتك انك ما بتحبش حد يغلطك
* لا مش كده..غلطني براحتك بس ما تجيش عليا وما تحكمش على حاجه وانت مش مكانى
 ده طبعا مش مبرر للي بيحصل فى الدراسة بس اهو اللى حصل
- احسن واحد يخلع من الحوار حتى لو الطرفين مش مقتنعين بس اتقفل بشياكة
* تربيتك والله 
بس اتصدق احنا مع بعض على طول واو مرة افكر اكتب حوار زي ده 
- خدت بالي بس قولت اسيبك
* انشره ولا بلاش؟
- هتنشره طبعا لأن دى اول مرة تذكرنى فيها بطريقة مباشرة كده
* قشطة ماشى هنشرهولك بس بلاش شغل الاعلانات ونسيح لينا..هننشره بهدوء كده واللى قرأ قرأ واللى ما قرأش ما قرأش
- وهتسميها ايه؟
* اكيد مجنون رسمي
- تقريبا المدونة دي هتبقى شهادة رسمية انك مجنون
* انا كاتبها عشان كده اصلا..يمكن الناس يتعاملوا معايا على اني مجنون ويرفعوا عني الحرج ويبقى اريح
- لا صايع
* زيك بالظبط :)
- هتعرفنا ازاي للناس؟
*سهلة دى اعمل زيي
* انا احمد
- انا نفسه

بحاول اكون انسان

بحاول اكون انسان بس مش عارف
بحاول احاسب نفسي قبل ما اغلط برده مش عارف
وكل يوم اسألنى هو فعلا في ضمير
والا ده مجرد سرحان سرير
واقول يمكن غفل عني وساعات بحس انه ضرير
ويقوم ويفوق

وارجع اغلط وارجع اندم

وافتكر قصص التسامح والسماح
ناس بالنسبة ليا اي شيء منهم مباح
وناس مجرد تقبل وجودهم كفاح
وناس نسيتهم من غير اي ذنب 
وناس خلدت كلامهم مع انه كان نباح

مش عارف ليه ما بنفهمش الانسانية غير اوقات الضعف
وقت الفراق وانت بتقاوم دموعك 
وانت عارف انك مش هتنفذ وعودك
وانت بتراهن بقوتك
في عز لحظات الوهن

والا وقت البعاد وانت كل اللى بيصبرك حضن دافي
اتنست فيه كل المآسى 

وبرغم كل نفوس البشر 
اللى من ذنوبها اسود لها الحجر
 نفسي ارجع بريء
نفسي ابطل اعد مطبات الطريق
ورغم ان عقلى طليق
قلبي خنيق
لسه محتاج انسانية
عشان يشم الحرية

رهان خسران

انتى رهان خسران 

انتى رهان خسران زى فرس جامح ساب غير صاحبه يركبه وبقى فاجر
ويا ريته كسب طلع الأخير فى الآخر

انتى رهان خسران زى لعبة بنج الكوره عاندت وما لمستش التاتش فى الاخر

انتى رهان خسران زى بنت الورق 
يقشها اى ولد وبتضحك على الشايب

انتى رهان خسران زى بنك الحظ 
يوم ما الظهر يعاندك ويجيبك ثه
تلائيك فى المربع اللى يوديك السجن

انتى رهان خسران على عروسة بحر طلعت جن

انتى رهان خسران بعد ماتش ممل على عصير حمضان

انتى رهان خسران زى ساعة قفلة دومينو وانت فى ايدك دش

انتى رهان خسران فى دور قمار لف فيه الورق بالغش

انتى رهان خسران زى يوم ما تلعب مع طاووس وتلائيك فى قفص القرد

انتى رهان خسران زى عصفور نقر صاحبه بسبب اللب

انتى رهان خسران زى جول حلو واتحسب تسلل عند

انتى رهان خسران عى بطة مشوية باتت بومين فى الفرن وطلعت برده نية

انتى رهان خسران على لون وردة حلوة بس ريحتها دم

انتى رهان خسران على مزيكها حلوة ترنيمتها قلبوها فى الوزن

انتى رهان خسران اخرى أألش عليه واللى راهنت بيه هعتبره صدقة ود

انتى رهان خسران راهنته وانا سكران

ما خسرت فيه غير الوقت

اجتماع داخل الحرية والعدالة

بدات القصة وقت ما قابلت صاحبى وقالى انا رايح صالون سياسى ..وانت جاى معايا.قولتله فين فقالى فى حزب الحرية والعدالة .طبعا سمع اصوات مش ظريفة على الفاظ غير لطيفة وكان فى واحد صاحبنا تالت كان بيساعدنى.
بعد مداولات ولقيت ان مش وراية حاجه قولت هروح ..وطبعا نالنى من الحب جامد من صديقنا التالت.روحنا المقر واستنينا شوية ..الناس دى مواعيدها مش مظبوطة اوى :D

دخلنا المقر اعدنا نقرا شوية انجازات لمرسى وللحزب وشوية شعر وكده اعدنا..كان موجود فى الصالون حوالى 50 عضو تلتهم سيدات وكان اللى بيجاوب فى الصالون ده احد قيادى الحزب وعضو فى مكتب ارشاد وعضو مجلس ..ومش هقول اسمه

 كان قاعد جمبه احد قيادات الجماعة اللى  معروفين فى المدينة وكان هو اللى بيدير الحوار..بداوا بحمد الله والصلاة على النبى والترحيب بالحضور وبعد كده طلب العضو انه يسمع الاسئلة فى الاول قبل ما هو يتكلم

بدات الاسئلة وبصراحة معظم الحضور سال اسالة كل الشارع بيسالها
يعنى مثلا اسالة عن الداخلية والاعلام بس اهم اسالة انا فاكرها
ازاى السفيرة الامريكية بتتحرك داخل مؤسسات الدولة عادى وكان اللى بيسأل السؤال متضايق اوى وبيقول هى مش دى سياده امريكية على مصر
-وكانه نسى ان امريكا بتدينا دعم وان الاخوان ما بيخدوش خطوة غير لما يسالوها ..

احد الاسالة برده ليه الاخوان ما احتووش الازمة بينهم وبين السلفيين وكان ممكن الموضوع يتلم وما يشمتش فيهم الحاقدين
سؤال تانى عرفنا اصل الانجليزى بتاع مرسى لما واحد سأل وقال ليه سايبين الناس الفلول يتكلموا فى الفضائيات وبيعضوا فى النظام وفى هذا السؤال وصف احد الفلول بانه كان big dancer in the national party
انا اخدت وقت كبير لحد ما صاحبى ترجملى انه يقصد الحزب الوطنى :D
كان اكتر سؤال صادم ليا لما شاب سال عن اين مشروع النهضة وليه مفيش معالم واضحة ليه
-انا بصراحة اتخضيت من السؤال ..اما انتوا مش عارفين فين النهضة انا اللى هعرف
كان نصيب الاسد من النظرات الشائكة لما صاحبى سأل ليه تصريحا اعذاء الحرية والعدالة بتكون تصريحات مش مسؤولة زى
العضو اللى اتكلم عن الطين والصدور وطبعا الخبر اتنفى جملة وتفصيلا وبعد كده ساله ليه فى تخبت فى مؤسسة الرئاسة
ومتى ستقنن جماعة الاخوان اوضاعها 
وشوية اسالة كمان وبعد كده بدا الرجل المبجل فى الكلام

بدا بالاعلام وان به فساد ما بعده فساد حيث ان التقارير تفيد انه يتم صرف 6 مليار جنيه على الاعلام 1.5 على الاعلان والباقى لا يعرف اين يذهب واخذ يتساءل اين يذهب هذا المال ولماذا يصرف رجال الاعمال كل هذا المال وما هى الفائدة غير اضعاف الدولة
-نسى ان كل عضو فى الحرية والعدالة بيقبض من اى قناة تليفزيونية وفلوس كويسة كمان..نسى كمان ان كل القنوات بتستضيفهم بينما القنوات الدينية وقناة 25 مش بيستضيفوا غير ناس معينة
كمل كلامه ان كل الدول العربية باستثناء قطر ضد الثورة لانهم خايفين من المد الثورى ولذلك بيدعموا جبهة الانقاذ والحبهات الاخرى
-وهى يعنى جبهة الانقاذ دى اللى مش ثورة #عبث
 دخل من الاعلام فى مشكلة بورسعيد وحول على الداخلية
فى كلامه عن الداخلية شنجنى الصراحة لان كلامه ان هما كويسين بس احنا نصبر عليهم..اه فيهم وحشين بس كله هيتعلم مع الوقت..وانه رفض عدم تسليح الداخلية وان الناس دى بتموت وهى بتدافع عن السجون وعن الممتلكات
وذكر واقعة غريبة ان استشهاد الشيخ عماد عفت جاء من مسدس كاتم للصوت من مسافة قريبة بما يعنى انه مش من الداخلية وان حد يقصد الوقيعة هو اللى عمل كده
الناس دى بيستشهد منها كتير والاعلام مش بيتكلم عنهم فلازم نقف جمبهم ومع الوقت كله هيتصلح
-طبعا انا جالى غثيان من الكلام وتويتر يشهد ..اه سلحهم وخليهم يدافعوا عن نفسهم..بس انا نفسى اعرف هما فعلا بيشتغلوا؟؟ مرتبات مرتبات وقضية تسليح ومش تسليح..طيب نتكلم عن المعاملة الادمية االى مفروض يتعاملونا بيها ولا ايه رايك ..كان فى كلامه بيقول ان فى حلول وان ممكن خريجى حقوق يشتغلوا فى الداخلية بس هو فضل الصبر على الجهاز الموجود..لا الشرطة دى جزء مهم وفى جهات عايزة تكسر الداخلية واحنا مش هنسمح انها تتكسر..
-لا تعليق.......اظن الرسالة وصلت
من الداخلية الى القضاء وازاى فى قضاء فاسد وقضاة بيمشوا امورهم مع المجرمين وذكر واقعة افراج عن تاجر مخدرات عشان ظبط مع القاضى وبعد كده هو  العضو ده بعت للمحامى العام اللى وصل الموضوع لوزير العدل اللى خلاه يبعت يفتش..وانا القضاء فى حلو وفى وحش بس الوحش كتير
-يا سبحان الله .. لو كان قال نفس الكلام اللى قاله عن القضاء قاله عن الداخلية كان ممكن اصدقه

وبعد الكلام فى المواضيع السابقة كان فى اسالة لسه ما  اتجاوبش عليها
زى السؤال عن السفيرة الامريكية اللى قال انها بتبص بس لكن مش بتتدخل فى قرارات وكفاية موقف الرئاسة ايام ضرب غزة
وقال لما نبقى فى وضع احسن اكيد مش هنسمح باى تدخل
كما ذكر ان ايران مستعدة تضخ مليارات فى مصر بس احنا مستنيين الوقت المناسب عشان ناخد اللى احنا عاوزينه بشروطنا احنا
كمان فى السؤال الخاص بحزب النور والازمة الخاصة بعلم الدين..قال انه ما يعرفش اى تفاصيل بتحصل فى قصر الرئاسة بس من الوقف الحالى ان السلفيين هينزلوا الانتخابات مش متحالفين مع اى حد وكمان وضح ان فى خلافات سياسية مشروعة بتحصل كتير بين الحرية والعدالة والنور حيث ان النور بيتهم الحرية والعدالة كثيرا انهم يريدون الشارع بينما النور يريد الشريعة
-من احد التصريحات التى ابهرتنى
وكان رضه عن اين مشروع النهضة قال ان هما مسكوا البلد كانها شخص بينزف ..وهنا صاحبى ذكر مكان النزيف وبصراحة انا ما قدرتش امسك نفسى من الضحك لان الوصف والتعليق كانوا اطرف من بعض ..المهم ان قال ان فى حاجات كتير فى الدولة واقعة وان تمت الموافقة بتحويل مشروع النهضة من مشروع حزبى الى مشروع للدولة

فى السؤال الخاص بتقنين جماعة الاخوان قال ان الشورى معاه التشريع فى الامور الطارئة فقط ومنتظرين البرلمان عشان يشرع كل القضايا العالقة

فى نهاية الحوار والمناقشة اتذكر الاعلام مرة تانية واحد الموجودين سال سؤال ساخر ليه ما نلمش الاعلاميين ونعمل معاهم حاجه زى مجزرة القلعة الضحك زاد شوية وبعد كده اللى بيدير الحوار ذكر ان الشعب المصرى يحتاج دراسة عشان يعرفوا يتعاملوا معاه وهنا صاحبى اتعصب وبدا صوته يعلى وانا اللى هديته
بس الحقيقة ان العضو استنكر كل الحديث ده من الموجودين وقال ما ينفعش الاسلوب ده احنا بنتعامل بالحسنى لحد ما يتصلحوا ولو ما اتصلحوش احنا نصر على الحسنى والمخالف نعامله بالقانون
-عجبنى فى النقطة دى جدا

ذكر ان عشان فى كلام كتير وان كل الناس عاوزة توقف البلد فكان لازم اعلان موعد الانتخابات عشان الناس تلائى حاجه تشغلها ونسيب الدولة تمشى

فى النهاية شكر العضو الموجودين وخرج ومسك امين الحزب بالمقر المايك وطلب شوية حاجات
اولا النوتة الانتخابية ..كل عضو حزب هياخد نوتة ويحاول يلم ناس وياخد بيانتهم عشان يوم الانتخابات يبقوا حاضرين وبالتالى يعرفوا الحد الادنى من الحضور كام ..وقال ان لو كل واحد جمع 10 اسماء على يوم الانتخابات هيبقى عندهم عدد معقول
ثانيا فى سلع موجودة فى الحزب الاعضاء يشتروها كانت خضروات ورز وده لدعم المقر
اختتم كلامه ان فى تانى يوم فى اجتماع لجماعة الاخوان المسلمين لعرض تاريخها للى حابب يحضر
كان مكان الاجتماع مقرر بس الموجودين غيروه ليكون مقر الحزب
-وهنا يتجلى الفصل بين الحزب والجماعة فى وسط ابتسامتين صفراوتين بينى وبين صاحبى :)

لحد هنا الاجتماع خلص

الناس دى فعلا منظمة..مقر شيك مجلة مكتوبة ونظمة بغض النظر اللى فيها من انجازات صح ولا غلط حاس بيه ولا لا
كله قاعد فى مكانه طريقة الحوار سلسة مفيش تجاوزات كله عارف دوره
بنسمعك وبتعمل الى احنا عاوزينه فى الاخر
لكل واحد دور لازم يعمله وكل واحد لازم يدعم

الناس دى اللى بيغلط فيها بيتحاسب ..ممكن انوه عن العضو ده انه صاحب تصريح عدم موافقة الاخوان على اختيار المجلس العسكرى ل10 فى حكومة الجنزورى ..وقال انا صرحت من غير اذن واتعاقبت وكان لازم اصبر
وكان تعليق احدى السيدات الفاضلات ان ليه لا ما وافقتوش ..قال لاننا محبناش يتلوى دراعنا
-وعنده حق

بس اكبر مشكلة قابلتنى فعلا ان الناس دى ما يعرفوش ان هما اللى بيحكموا..لا اعضاء الحزب ولا كلام العضو الموكر يدل انه عارف ان هو اللى فى ايده القرار..مستنين البلد تتصلح بس مش عارفين ايه المطلوب ..بس هما عندهم صبر


ده الصورة بنسبة 90 % ممكن اكون نسيت بعض التفاصيل الصغير بس اكيد مش بقصد..واسف لو قولت رايى فى النص

المنحنى الخيالى فى تفسير الواقع الحالى

المرة دى فكرة جديدة مش زى اى موضوع كتبت فيه قبل كده .
مش عارف ليه دايما الافكار بتجيلى وانا فى المواصلات لواحدى..بتنزل عليا الهواجس وأعد ارتب فيها واحدة واحدة  ..وعشان ما اطولش عليكوا ركزوا معايا...


تخيل معايا ان فى منحنى ثلاثى الابعاد فى محور X وده بيمثل الرجل وفيه محور Y وده بيمثل المرأة وفى محور Z وده بيمثل الوقت..
دايما بنبتدى بنقطة الاصل اللى هى نقطة بداية المعرفة بين الرجل والمرأة ..

أول ما يعرفوا بعض يبدا الزمن يعد والمحور يبدأ يترسم واحدة واحدة وبشويش ويزيد فى المحاور التانية بشكل بسيط
فجأة يتعلقوا ويخلق الروتين فى المعرفة والمحور بيزيد فى كل الاتجاهات بعد كده طرف بيحس انه مشدود للتانى او الاتنين يتشدوا فى نفس الوقت فميل المنحنا يبدأ يزيد .

تبدأ علاقة الحب وميل النحنى بيزيد اكتر وتحس انه هيكسر حاجز الزمن.
العلاقة نتهى ...
هنا تلائى المنحنى وقف لحظة وبينزل بس مش بسرعة
تفضل كده فترة اللى هى فترة الشك وارادة العودة والتقليب فى الذكريات و انتظار نور الامل والكلام ده

فجأة النور يقطع وتبدأ تكره فى اللى أدامك وتندم على الاطلال وتقول ايه اللى انا عملته ده
فى المرحلة دى بيكون معدل نزول المنحنى عنيف والعصبية زيادة والأدريناين مضيع الدنيا

لذلك فإن منحنى المشعر ده هو المنحنى اللى فيه اتنين break point


بعد كده بيثبت المنحنى انه ماشى مع الزمن ثابت فى مشاعر الطرفين ممكن يكون صفر وممكن يكون اكتر من كده حاجه بسيطة لو افترضنا ان فى عشرة و تقدير واحترام بس المهم انه ثابت
فى انتظار نقطة اصل جديدة يبدأ من عندها


سألت نفسى سؤال ومش عارف ليه فكرت فيه بس يظهر انى بحب انكد على نفسى
هو انا فى انهى مرحلة؟
لقيت ان اجابة السؤال فلسفية شوية
عشان تشوف الصورة كاملة ...لازم تكون بره الكادر
انا بره الكادر يعنى فى المرحلة اللى جهاز رسم القلب فيها عامل تيــــــــــــــــــــــــــــــــــــــــــــــــــــــــــــــــــــــــــــ




بعد كده لقيت نفسى وصلت وابو العز بيكلمنى بيسالنى على مكانى عشان يوصلنى :)

اصعب اكتمال

كلما بحثت عن مشكلة لما فيه مجتمعنا الان من انقسامات سواء عقائدية او فكرية او مذهبية او حتى ادارية لا اجد غير مبرر واحد.
حاولت ان اجد مشكلة هذا المبرر وكيف يتم حلها بدل من الجلوس وتراشق الاتهامات واتهم كل من له صله بهذا المبرر وانا عاجز تقديم حل.
فى تقديرى الشخصى ان مشلكة مصر فعلا تكمن فى الدراويش..وهم من يتبعون اشخاصا رمزية من وراء هوئهم الشخصى وذلك تحت مسمى دعم الفكرة.
الكل يتبع بلا تفكير او تدبر ولا يرضى احدا عن اخر مختلف معه الا اذا انضم الى قطيعه الخاص.
مشكلة عميقة بالفعل لكن الوحيد الغير مسئول عنها هو الدرويش ذات نفسه.
لقد وجد نفسه هكذا تابع ليس لديه خيار او صوت او حرية فى اى شيء فظل يبحث عن شخص يكون صوته مسموعا يتبعه كى يقنع نفسه بانه موجود.
فى الحقيقة ان المسئولية تقع على كاهل كل من تصدر مشهدا سياسيا او كان فى موقع اتخاذ قرار.
نرى الان حروبا سياسية طاحنة من اجل تطبيق الشريعة ووضعا فى الدستور والقوانين المسنونة وكيف يتم تطبيق الحدود وكيفية ادارة الدولة بالمرجعية الاسلامية كما يروها من وجهم نظرهم العقيمة.
لماذا عقيمة؟؟ 
لانهم بالفعل لديهم خلل فى مفهومهم للشريعة وتطبيقها ولو اقلهم علما على الاطلاق وهو اعلى منى بمئات المرات تدبر اول ايات القران الحكيم التى اوحى بها الى نبي الله الكريم ﷺ وتكون :اقرأ.
هل هناك رسالة اوضح من ذلك على ان رفعة الامة بالتعليم وليس بالكلام؟ 
استحضرتنى قصة حدثت بعد غزوة بدر ,كان شرط الرسول ﷺ لكى يشترى اسير مشرك حريته من الاسر ان يعلم 10 من المسلمين القراءة والكتابة.
لم اجد احدا من الحاكمين يبحث هن شيء مثل هذا بل يتم الصلح مع من افسد فى مقابل المال بمجرد سد عجز ما ولا توجد اى فكرة على اساس علمى لاى تنيمة اقتصادية دون اهدار حقوق ناس ظلمت واعطاء من ظلم فرص اخرى للفساد.
فى الجانب الاخر فيمن يعترضون على الحكم الحالى والذين يتهمون الحكام بكل الصفات التى هى فيهم ايضا لا نجد احدا ينظر الا هذا الركن البعيد الذى هو الضامن الوحيد لبقاء هذا الشعب.
يتشاجر الجميع على الحقائب السياسية والاحكام القضائية والكل يريد ان يحكم كى يطبق فكره الخاص لا لكى يطبق فكر المواطن الخاص كما هو مفروض.
ويتعامل الجميع مع حقيبة التعليم على انها حقيبة فارغة ما بها غير قلم رصاص مقصوف..ومن يحملها لا يتعدى دوره اعلان مواعيد انتهاء الدراسة وبدايتها وتكريم اوائل الثانوية العامة.
انه لخبل
انه لخبل ان نجد الاحزاب السياسية ذات رؤى خاصة تتصارع من اجل لجنة التعليم فى البرلمان..
هل ستنشيء مناهج خاصة بك؟؟ ام ستجعلنا نتعلم على طريقتك؟؟ام ستعلمنا ما تريده انت فقط؟؟
اجد الكثير ايضا يمجدون عبد الناصر فى هذه القضية لانه جعل التعليم مجانى..وارد عليهم انا نعم وفقط..
جاء من كتب التاريخ حسب الهوى واعطانا ما اراده هو ولم يجعل لاحد حرية الاختيار واكمل من بعده الباقى

تعلمت انك اذا اردت ان تزيد مالك ا تضعه فى بنك او خزانة ..وانما ادخله فى دورة مالية كى يزيد..وانا صراحة لا اجد احسن من مشروع استثمارى لانتاج عقول ..لانك كلما زودت عدد العقول زودت الانتاج بدل من تفكر فى زيادة الانتاج بعقول تضمحل.

 صراحة وبوضوح لن ادعم موقفا سياسيا او اقتصاديا بعيدا عن هذا المجال لان لا يوجد وقت مناسب اكثر من هذا.
بدل اجراءات تقشفية لاسباب مادية ومجرد مرتبات..اجعلها تقشفية لدعم قضية واحدة وهى التعليم وهو ما سيحل لك باقى القضايا.

عزيزى الاعلامى سواء مقروء او مسموع..
كفى تحليلات سياسية واقتصادية وتفسيرات لمشاهد نراها جميعا بالعين المجردة وقدم لنا الجديد..دعم قضية نحتاجها جميعا وانت تعلم ذلك

علمونا بماذا نطالب وكيف نطالب ..لا تجعلوها تحت تصرف الاهواء..هذا الوطن ليس ملكا لنا وحدا وانما ملك افرادا لم يأتوا للحياة بعد ..لا تختاروا لهم ما يضرهم وحاولوا ان تنفعوهم..
حرروا الافق واضغطوا بما يفيد وكفاكم هراء لن نجد من ورائه غير طفح المرارة..

متى ستكتمل الثورة ..ستكتمل الثورة عند انقضاء دورة علمية كاملة ..ناجحة يخرج بعدها المواطن يعرف حقوقه وواجباته من كافة النواحى الادبية والاجتماعية والوطنية ..يعرف ماذا ينتج وكيف ينتج

لديه القدرة على الابداع
ويعرف ان تعبه لن يضيع سدى

القول

اهداء الى
كل من قال ولا فادشى
وكل من فاد ولا قالشى
وكل من قال ويقول وكل من قالشى ولا هيقول
وكل من نسانا طعم صدق القول
وكل من خلانا ننام ومانامشى

قالولى قلت ليه قلت مش عارف
انا لاقيت ناس بتقول وناس قالت
وناس قالولنا وناس قلتلنا وقالو ومقالوش
قولت لما انا يعنى هقول هيقولوا اشمعنى انت اللى تقول هو انت كنت عارف
ولكن للحكمة الالهية انها جت عليا واول ما جيت اقول اقالولى ما تقولشى
هما قالولنا وانت مش عارف
قولت مين هما
قالولى مش عارف
قولت ماشى وقعدت افكر فى مين قالولهم ومين قالولنا
ومين اللى كان ورا كل قول اتقال وكل ما اتقالشى
معارفشى
لقيت كتير قالوا وكتير بيقولوا
بس الغريب ان كل حاجه كانت اتقالت بعد ما اتقالت يتقال انه ما اتقالشى
وكل ماتقالشى اتقال انه اتقال
ويقولك مش قولنالكوا اللى كان مفروض اتقال (مع انه ما اتقالشى)
وعشان انتوا مفهمتوش انه اتقال فكرتوه انه ما اتقالشى
ما اهو اصلا ما اتقالشى
وقولتلنا انه اتقال وما اتقالشى
يعنى ينفع للدين نعم او لا وبعد النتيجة يتقال ما قولنالكوا ومنقولشى
ده حتى يبقى عيب لما نخاف من كلام اتقال لانه خلاص اتقال
لكن العيب اكتر اننا نخاف من كلام ما اتقالشى
قالك ما تسكتشى بس يا ريت تقول حاجه اتقالت ولو هتقول حاجه ما اتقالتشى فمتقولشى
قولتلهم انا لما قولت اللى اتقال قولتولى ما تقولشى
بس لما ما تقالشى اللى كان مفروض يتقال
عرفت انى هعيش اقول اى حاجه غير اللى مفروض يتقال
لان اللى مفروض يتقال لسه ما اتقالشى
والا ما كانش يبقى اسمه المفروض يتقال
احنا قولنا ما نقولشى عشان يبقى فى بيقول وقال واللى مقالشى

January 6, 2012

هجاء الرئيسة

هى من تريد ان تكون
هى من تريدك ان تكون
وهى التى تأمر وتنهى وتسحرك بنظرات العيون


هى من يتهمك بالجنون
هى ذات العقل المصون
وهى ان عارضتها أرتك فى الظهيرةِ النجوم


هى كل شئٍ وضده وكل ازدواجٍ محكوم
هى البسمة والبكاء والحيرة والرخاء
هى كل شئٍ فظٍ جامحٍ معلنٍ مكنون


سرك عندها مكتوم
حتى ساعة الغضب فهو للعموم


تتحرك كأنها دارسةٌ متأنيةٌ
ولكنها مجرد سابحة فى الكون


كبرياؤها ينكسر تحت قدميك فقط إذا أرادتك حنون
او ان شاءت رغباتها فى لذات الجنون


فأذا حصلت عليك ..صبت عليك كأس عذابٍ مختوم


اما اذا حصلت عليها واحسست بالسعادة
فاعلم انك موهومٌ موهومٌ موهوم


May 21, 2012

حياة

-ماتت..؟؟
لا لم تمت
-تركتنى وذهبت؟؟
لا 
ولكنها صمتت
صمتت حينما ادركها التعب
سكتت عندما جاءها الملل متلونا بالوان الصخب
نامت وبكت
فى انتظار انقضاء الليالى الطوال
فى انتظار قتلك للملل
بظهور القمر
او حتى هطول المطر
او شمس تأتى مشرقةٌ تمحو الشعور بالخطر
او تأتى بيومٍ جديد ٍ ظننت انه قد مضى

-كيف ارجع وقد ضللت الطريق؟
افقدت الرفيق؟ افقدت خيال الحر ايها الطليق؟
ام ادركتك متاع الحياة فاصبحت لها لصيق
ام تبرأت من احبابك فاصبحت لقيط
كيف نسيت رسالتك واتخذت الدنيا صديق
كيف قمعت ما فضلك الله به وظننت انها لن تضيق
كيف هى الان الحياة؟ضيقة؟
-نعم
هذا ما ظننت
واتمنى ان تكون قد تبت

ما العيب منك انما العيب على من جعلتك ترى للارواح حياة
من جعلتك تجرى وراء كل شيء نفسك مبتغاه
من عصبت عينيك عن جمال ما بعد الحياة

ما ادنيا الا نفق
فى اخرها سراب تظن انه شفق

وما الفكرة الا حياة 
لا تموت مهما  توارها التراب

شخصى جدا

اعلم جيدا انى لست بكاتب محترف ولا اصلح حتى لكتابة رسائل حب تجارية رخيصة ليس بها اى ابداع,ولكن ها هى الحال فكلما ابتعدت عن تجاربى الروتينية التى هى فى مجنونة فى حد ذاتها اشعر بأن هناك خلل ما.
غالبا ما يكون هناك ظرف حياتى ممل او مشكلة لا اعلم من اين اتت ولا متى ستحل ولكن ما ان يظهر النور واجد نفسى مستمتعا بكل ما كان يحدث من قبل,هرتلاتى فى النواحى الدنياوية ومتابعتى لاخبار الرياضة والاهتمام بعلوم الاقتصاد التى احبها ولا اعلم لماذا لانى لست جيد فى علوم الرياضيات(تجربتى مريرة) الاستماع الى الموسيقى وهذا لم يعد يحدث ولا اعرف لماذا ربما خوفا من مشاعر معينة وطبعا الهرى السياسى الذى اصبحنا نجيده جمعاء.
ولكن من الملاحظ فى الفترة الماضية اننى لم انسى نفسى وحسب,بل اصبحت كفيف بعض الشيء حينما غضضت البصر عن اناس كثيرين من حولى.المشاكل كانت تتزايد ولكنى فشلت فى التفريق فى المعاملات بين اشخاص من النادر ان تجدهم فى هذه الايام السوداء وبين مشاكل اخرى كنت اعلم من داخلى انها ستمر ستمر.
والحمد لله على انى تداركت الخطأ سريعا على امل الا اكون قد قصرت بشكل كبير لا يسمح بالغفران لى
وعلى بعد ذلك ان ابحث عن كل ما احب وافعله , لنبتكر افكار مجنونة مجددا ولنعاود حياة الاشقياء 
اعتقد ان ما لن استطيع فعله كالماضى هو المذاكرة ,لان الموضوع شكله بايخ 
وهناك ما لن يتركنا ولم يتركنا وهو الله ..فهو مددنا وحامينا فى كل وقت وحين
اذا لم تستطيعوا العيش فتعايشوا..فالدنيا صغيرة تريدنا ان نهتم بها كى تنصرف هى عنا
والاخرة خير وابقى