هي صعبة

هي صعبة
في كل حاجه من غير مبالغة
عنوانها التحدي
اللي يوصلها يبقى ولد
مع انها في كل بلد

وعشان تدخل قلبها لازم تفضي قلبك لها
كل اللي عليك احترامها
وانك تعترف بقوتها

اكبر تجسيد لاحلامك
بتقولك اسرح وانا خدامك
حتى صوتها عمره ما ينفرك لانه حتة من صوتك
حاسة بيك من غير كلامك

يا سلام عليها فيها الدلع والفرفشة
كفاية الضحكة 
ويا سلام لو هزت وسطها
والا رعشة جسمها
والا لما تسيب نفسها

يا سلام عليها في السكون
تعرفك اد ايه انت حنون
ولا انك تعترف ان مقاومة سكاتها جنون


الطاعة الكاملة مكفولة
ثقتها فيك مش محدودة
طول ما انت جمبها
لازم تجرب صدقها
تحب لعبها ورقصها
عمرها ما هتسيبك الا لما انت تنساها
حتى لو سبتها كل يوم هتفكر ترجعلها
وترجع تشد حبال مودتها

صدقوني محدش كتير قابلها
بس فيها كل المعاني اللي مش في حد تاني

اصلها مش اي بنت
دي ماريونت

تفاصيل تايهة

تاهت مني التفاصيل و أولها اسمك
ولا عارف فين مكانك ولا منين أجيب عنوانك
تاهت مني صورتك وكمان ملامحك
حتى ابتسامتك اللي كانت ماسحة همك
حتى برائتك في نظرتك
ومن غير ما اسمعك نسيت صوتك

كل ده مش غلطتي ده غلطتك
انتي اللي طولتي بعادك
واستنيت انا كتير معادك
وشغلتي وقتي 
ولا يوم شاركتيني وقتك

انا عارف ان في الحلم كانت زيارتك
وكان كمان من غير ما أقولك
بس ده لقى المنام يعني لا بيدي ولا بيدك
ومن كتر ما طال بعادك خفت احس اني نسيتك

أوعي تفكري اني بعاتبك
دي طريقتي ...
وانتي رافضة تعرفيني طريقتك
يعني لو كنت برسم كنت اكيد رسمتك
ولو كنت بعزف كنت عزفتك
وكتبت نوتة بتوصف كل حتة في جسمك
ولو كان صوتي حلو كنت غنيتك 
ومليت الدنيا غنى وصف لسكوتك

بس انا عجزت اني اوصلك
عارف اني مقصر بس طامع سماحك
يمكن زي ما كنتي في حلمي تسمحيلي اكون في حلمك
واخد وقت من وقتك

حتى لو اليوم ده ما جاش والزمن اخدك
ورغم اني نسيت حاجات كتير كان فيها تفاصيلك
تبقى حقيقة واحدة بس لا يمكن تتنسى

هي وجودك

حكاية لوحة

بعد السلامات
ومن غير أى مقدمات
هحكيلكوا حكاية لعبة
من كتر ما غالية عليا خبيتها زمان في النيش
والنيش طبعا في بيوتنا واقف عليه الف شاويش
ممنوع اللمس وان فكرت تقرب وش هيتعملك فيش

عدت ليالى طويلة ووصلت لسن الشباب
وفي كل سنة كان بيزودا لأوضة النيش باب
وبعد ما طلع الاتاري بطلت اهتم بالالعاب
ولما بزهق كانوا دايما ينصحوني انى أقرا كتاب
طبعا عمري ما مسكته لاني اول ما افتحه كان النوم غلاب

وفجأة افتكرت لعبتي 
دخلت في يوم اتسحب بفتح النيش
مش عارف ليه بتسحب بس هتقولوا ايه للي تفكيره مفيش

لقيتها واقفة
لعبتي اسمى معاني البراءة فى الحياة
لعبتي اللي مهما زعلت كانت بتبسطنى
دي الحاجه اللى عادي نفسك تتكسر ولا انها فى يوم تنكسر
لعبتي اللى اكتر صاحب ليا عمره ما قضى معايا ادها

في الفترة اللى بعدت فيها عن لعبتي حبيت اللوح
كان نفسي في لوحة مرسومالى على شط هادى
ساعة الشروق ساعة ميلاد الامل

كان في بنت حلوة في خيالى دايما بتكمل المشهد
ياما  اختلفت على مكانها
ما بين هى اللي ترسمني وما بين وجودها في المشهد
فنجان قهوتى محطوط جمبي وانا واقف ساند على المسند

عارف ان حلم اللوحة بعيد
يمكن مش اوي يعنى بس البنت الحلوة اكيد ابعد

هو تقريبا نفس البعد لكونى على الكمان العب 

وبعيدا عن عالم الاحلام 
اخدت قرار وبكل اهتمام
قولت اجمع بين الاتنين
اللعبة واللوحة
واهم حاجة الاواني ما تكونش مجروحة
وقهوتي مش هتنازل عنها جمبى وزى ما هي مظبوطة

هتبقى حاجه للذكرى 
حاجه تجمع بين شبابي وطفولتي
حاجه كل ما المحها امسح بيها همي
يمكن لما حد يشوفها يدعيلي بعد ما يطير دمي
وكالعادة نسيت اهم حاجه حاجه
ما بعرفش ارسم..طب مين هيرسمني

مجنون رسمي (حوار)

- عارف انك تعبان يا عم احمد
* لا يا عم لا تعبان ولا حاجه ,ازاى هكون تعبان وانت معايا
- ساعات بحس انك راضي عني وساعات بحس انك منفضلى
* لا طبعا....انا اللى اهم حاجه عندى انك تكون راضي عني
- يعنى مش عاوز حد معايا؟؟ يمكن اكون مش كفاية
* لا كفاية و100 فل وعشرة ما تشغلش بالك
- بتحبها؟
* هي مين دي؟
- أي حد
* لا..حاليا مش عارف اركز معاني الحب فى حد معين
  بقيت بخاف انى انشغل عن حد اعرفه لمجرد ان واحدة اخدت اوضة في قلبي
- بس أكيد في يوم هتحتاج حد تتسند عليه
* عارف....بس انت معايا اهو
- انا معاك بس مقدرش اساعدك
 تشورني,تشاغلنى,تناكف فيا واناكف فيك
 لكن افرض بعدت وكل واحد من اللي حواليك انشغل , مين هيسأل عليك؟
افرض تعبت..مين هيناولك الدوا؟
* دي حاجات ربنا كاتبها مش بايدنا..وبعدين مين عالم ما يمكن ما اتعبش واموت مرة واحدة
 انت عارف اني ما بحسبش الحاجات دي كده
- انت عنيد ومقرف
* زيك بالظبط
*  طيب هو انا متقل عليك؟
- لا خالص..مش قصدي تفهم كده بس مهما اتفقنا ومهما اختلفنا هنفضل انا وانت واحد
 وفي يوم هنحتاج اللي يشيلنا احنا الاتنين
* قولتلك بلاش الكلام اللي يدل على الضعف ده وبعدين ربنا ما بينساش حد
- بس قالك خد بالأسباب
* ايوة يعني المفروض اعمل ايه؟
- ما تقفلش الباب خالص كده
 سيبه موارب وسيب احتمال لو 1%
* انت عارف اني دايما سايب احتمال
 وبعدين انا ليه حاسس انك بدأت تسمع من أمي اكتر ما بتسمع مني
- هههه لا مش أوى كده وبعدين مامتك ساعات بتتكلم صح واكيد ما تتمنالكش حاجه وحشة
* انا عارف طبعا ..بس دايما عندها مشكلة في التوقيت وطريقة الصياغة
- اتفلسف يا حيلتها 
* مش بقولك بقيت زيها..وبعدين مش نخلص الكلية أول والدراسة وبعدين نتكلم 
- انت بتهزر ..ما انت اللى عاجبك الحوار وبتهرب من أى مسؤولية
* واضح فعلا انى بهرب من المسؤولية..اومال لو ما كنتش شاهد معايا على ايام الشغل والبهدلة اللى فات منها 5 سنين وكنت انا وانت في قمة الملل
- فكرتني ليه؟؟
* ما انت اللي قولت بتهرب من المسؤولية 
- مشكلتك انك ما بتحبش حد يغلطك
* لا مش كده..غلطني براحتك بس ما تجيش عليا وما تحكمش على حاجه وانت مش مكانى
 ده طبعا مش مبرر للي بيحصل فى الدراسة بس اهو اللى حصل
- احسن واحد يخلع من الحوار حتى لو الطرفين مش مقتنعين بس اتقفل بشياكة
* تربيتك والله 
بس اتصدق احنا مع بعض على طول واو مرة افكر اكتب حوار زي ده 
- خدت بالي بس قولت اسيبك
* انشره ولا بلاش؟
- هتنشره طبعا لأن دى اول مرة تذكرنى فيها بطريقة مباشرة كده
* قشطة ماشى هنشرهولك بس بلاش شغل الاعلانات ونسيح لينا..هننشره بهدوء كده واللى قرأ قرأ واللى ما قرأش ما قرأش
- وهتسميها ايه؟
* اكيد مجنون رسمي
- تقريبا المدونة دي هتبقى شهادة رسمية انك مجنون
* انا كاتبها عشان كده اصلا..يمكن الناس يتعاملوا معايا على اني مجنون ويرفعوا عني الحرج ويبقى اريح
- لا صايع
* زيك بالظبط :)
- هتعرفنا ازاي للناس؟
*سهلة دى اعمل زيي
* انا احمد
- انا نفسه

بحاول اكون انسان

بحاول اكون انسان بس مش عارف
بحاول احاسب نفسي قبل ما اغلط برده مش عارف
وكل يوم اسألنى هو فعلا في ضمير
والا ده مجرد سرحان سرير
واقول يمكن غفل عني وساعات بحس انه ضرير
ويقوم ويفوق

وارجع اغلط وارجع اندم

وافتكر قصص التسامح والسماح
ناس بالنسبة ليا اي شيء منهم مباح
وناس مجرد تقبل وجودهم كفاح
وناس نسيتهم من غير اي ذنب 
وناس خلدت كلامهم مع انه كان نباح

مش عارف ليه ما بنفهمش الانسانية غير اوقات الضعف
وقت الفراق وانت بتقاوم دموعك 
وانت عارف انك مش هتنفذ وعودك
وانت بتراهن بقوتك
في عز لحظات الوهن

والا وقت البعاد وانت كل اللى بيصبرك حضن دافي
اتنست فيه كل المآسى 

وبرغم كل نفوس البشر 
اللى من ذنوبها اسود لها الحجر
 نفسي ارجع بريء
نفسي ابطل اعد مطبات الطريق
ورغم ان عقلى طليق
قلبي خنيق
لسه محتاج انسانية
عشان يشم الحرية

رهان خسران

انتى رهان خسران 

انتى رهان خسران زى فرس جامح ساب غير صاحبه يركبه وبقى فاجر
ويا ريته كسب طلع الأخير فى الآخر

انتى رهان خسران زى لعبة بنج الكوره عاندت وما لمستش التاتش فى الاخر

انتى رهان خسران زى بنت الورق 
يقشها اى ولد وبتضحك على الشايب

انتى رهان خسران زى بنك الحظ 
يوم ما الظهر يعاندك ويجيبك ثه
تلائيك فى المربع اللى يوديك السجن

انتى رهان خسران على عروسة بحر طلعت جن

انتى رهان خسران بعد ماتش ممل على عصير حمضان

انتى رهان خسران زى ساعة قفلة دومينو وانت فى ايدك دش

انتى رهان خسران فى دور قمار لف فيه الورق بالغش

انتى رهان خسران زى يوم ما تلعب مع طاووس وتلائيك فى قفص القرد

انتى رهان خسران زى عصفور نقر صاحبه بسبب اللب

انتى رهان خسران زى جول حلو واتحسب تسلل عند

انتى رهان خسران عى بطة مشوية باتت بومين فى الفرن وطلعت برده نية

انتى رهان خسران على لون وردة حلوة بس ريحتها دم

انتى رهان خسران على مزيكها حلوة ترنيمتها قلبوها فى الوزن

انتى رهان خسران اخرى أألش عليه واللى راهنت بيه هعتبره صدقة ود

انتى رهان خسران راهنته وانا سكران

ما خسرت فيه غير الوقت

اجتماع داخل الحرية والعدالة

بدات القصة وقت ما قابلت صاحبى وقالى انا رايح صالون سياسى ..وانت جاى معايا.قولتله فين فقالى فى حزب الحرية والعدالة .طبعا سمع اصوات مش ظريفة على الفاظ غير لطيفة وكان فى واحد صاحبنا تالت كان بيساعدنى.
بعد مداولات ولقيت ان مش وراية حاجه قولت هروح ..وطبعا نالنى من الحب جامد من صديقنا التالت.روحنا المقر واستنينا شوية ..الناس دى مواعيدها مش مظبوطة اوى :D

دخلنا المقر اعدنا نقرا شوية انجازات لمرسى وللحزب وشوية شعر وكده اعدنا..كان موجود فى الصالون حوالى 50 عضو تلتهم سيدات وكان اللى بيجاوب فى الصالون ده احد قيادى الحزب وعضو فى مكتب ارشاد وعضو مجلس ..ومش هقول اسمه

 كان قاعد جمبه احد قيادات الجماعة اللى  معروفين فى المدينة وكان هو اللى بيدير الحوار..بداوا بحمد الله والصلاة على النبى والترحيب بالحضور وبعد كده طلب العضو انه يسمع الاسئلة فى الاول قبل ما هو يتكلم

بدات الاسئلة وبصراحة معظم الحضور سال اسالة كل الشارع بيسالها
يعنى مثلا اسالة عن الداخلية والاعلام بس اهم اسالة انا فاكرها
ازاى السفيرة الامريكية بتتحرك داخل مؤسسات الدولة عادى وكان اللى بيسأل السؤال متضايق اوى وبيقول هى مش دى سياده امريكية على مصر
-وكانه نسى ان امريكا بتدينا دعم وان الاخوان ما بيخدوش خطوة غير لما يسالوها ..

احد الاسالة برده ليه الاخوان ما احتووش الازمة بينهم وبين السلفيين وكان ممكن الموضوع يتلم وما يشمتش فيهم الحاقدين
سؤال تانى عرفنا اصل الانجليزى بتاع مرسى لما واحد سأل وقال ليه سايبين الناس الفلول يتكلموا فى الفضائيات وبيعضوا فى النظام وفى هذا السؤال وصف احد الفلول بانه كان big dancer in the national party
انا اخدت وقت كبير لحد ما صاحبى ترجملى انه يقصد الحزب الوطنى :D
كان اكتر سؤال صادم ليا لما شاب سال عن اين مشروع النهضة وليه مفيش معالم واضحة ليه
-انا بصراحة اتخضيت من السؤال ..اما انتوا مش عارفين فين النهضة انا اللى هعرف
كان نصيب الاسد من النظرات الشائكة لما صاحبى سأل ليه تصريحا اعذاء الحرية والعدالة بتكون تصريحات مش مسؤولة زى
العضو اللى اتكلم عن الطين والصدور وطبعا الخبر اتنفى جملة وتفصيلا وبعد كده ساله ليه فى تخبت فى مؤسسة الرئاسة
ومتى ستقنن جماعة الاخوان اوضاعها 
وشوية اسالة كمان وبعد كده بدا الرجل المبجل فى الكلام

بدا بالاعلام وان به فساد ما بعده فساد حيث ان التقارير تفيد انه يتم صرف 6 مليار جنيه على الاعلام 1.5 على الاعلان والباقى لا يعرف اين يذهب واخذ يتساءل اين يذهب هذا المال ولماذا يصرف رجال الاعمال كل هذا المال وما هى الفائدة غير اضعاف الدولة
-نسى ان كل عضو فى الحرية والعدالة بيقبض من اى قناة تليفزيونية وفلوس كويسة كمان..نسى كمان ان كل القنوات بتستضيفهم بينما القنوات الدينية وقناة 25 مش بيستضيفوا غير ناس معينة
كمل كلامه ان كل الدول العربية باستثناء قطر ضد الثورة لانهم خايفين من المد الثورى ولذلك بيدعموا جبهة الانقاذ والحبهات الاخرى
-وهى يعنى جبهة الانقاذ دى اللى مش ثورة #عبث
 دخل من الاعلام فى مشكلة بورسعيد وحول على الداخلية
فى كلامه عن الداخلية شنجنى الصراحة لان كلامه ان هما كويسين بس احنا نصبر عليهم..اه فيهم وحشين بس كله هيتعلم مع الوقت..وانه رفض عدم تسليح الداخلية وان الناس دى بتموت وهى بتدافع عن السجون وعن الممتلكات
وذكر واقعة غريبة ان استشهاد الشيخ عماد عفت جاء من مسدس كاتم للصوت من مسافة قريبة بما يعنى انه مش من الداخلية وان حد يقصد الوقيعة هو اللى عمل كده
الناس دى بيستشهد منها كتير والاعلام مش بيتكلم عنهم فلازم نقف جمبهم ومع الوقت كله هيتصلح
-طبعا انا جالى غثيان من الكلام وتويتر يشهد ..اه سلحهم وخليهم يدافعوا عن نفسهم..بس انا نفسى اعرف هما فعلا بيشتغلوا؟؟ مرتبات مرتبات وقضية تسليح ومش تسليح..طيب نتكلم عن المعاملة الادمية االى مفروض يتعاملونا بيها ولا ايه رايك ..كان فى كلامه بيقول ان فى حلول وان ممكن خريجى حقوق يشتغلوا فى الداخلية بس هو فضل الصبر على الجهاز الموجود..لا الشرطة دى جزء مهم وفى جهات عايزة تكسر الداخلية واحنا مش هنسمح انها تتكسر..
-لا تعليق.......اظن الرسالة وصلت
من الداخلية الى القضاء وازاى فى قضاء فاسد وقضاة بيمشوا امورهم مع المجرمين وذكر واقعة افراج عن تاجر مخدرات عشان ظبط مع القاضى وبعد كده هو  العضو ده بعت للمحامى العام اللى وصل الموضوع لوزير العدل اللى خلاه يبعت يفتش..وانا القضاء فى حلو وفى وحش بس الوحش كتير
-يا سبحان الله .. لو كان قال نفس الكلام اللى قاله عن القضاء قاله عن الداخلية كان ممكن اصدقه

وبعد الكلام فى المواضيع السابقة كان فى اسالة لسه ما  اتجاوبش عليها
زى السؤال عن السفيرة الامريكية اللى قال انها بتبص بس لكن مش بتتدخل فى قرارات وكفاية موقف الرئاسة ايام ضرب غزة
وقال لما نبقى فى وضع احسن اكيد مش هنسمح باى تدخل
كما ذكر ان ايران مستعدة تضخ مليارات فى مصر بس احنا مستنيين الوقت المناسب عشان ناخد اللى احنا عاوزينه بشروطنا احنا
كمان فى السؤال الخاص بحزب النور والازمة الخاصة بعلم الدين..قال انه ما يعرفش اى تفاصيل بتحصل فى قصر الرئاسة بس من الوقف الحالى ان السلفيين هينزلوا الانتخابات مش متحالفين مع اى حد وكمان وضح ان فى خلافات سياسية مشروعة بتحصل كتير بين الحرية والعدالة والنور حيث ان النور بيتهم الحرية والعدالة كثيرا انهم يريدون الشارع بينما النور يريد الشريعة
-من احد التصريحات التى ابهرتنى
وكان رضه عن اين مشروع النهضة قال ان هما مسكوا البلد كانها شخص بينزف ..وهنا صاحبى ذكر مكان النزيف وبصراحة انا ما قدرتش امسك نفسى من الضحك لان الوصف والتعليق كانوا اطرف من بعض ..المهم ان قال ان فى حاجات كتير فى الدولة واقعة وان تمت الموافقة بتحويل مشروع النهضة من مشروع حزبى الى مشروع للدولة

فى السؤال الخاص بتقنين جماعة الاخوان قال ان الشورى معاه التشريع فى الامور الطارئة فقط ومنتظرين البرلمان عشان يشرع كل القضايا العالقة

فى نهاية الحوار والمناقشة اتذكر الاعلام مرة تانية واحد الموجودين سال سؤال ساخر ليه ما نلمش الاعلاميين ونعمل معاهم حاجه زى مجزرة القلعة الضحك زاد شوية وبعد كده اللى بيدير الحوار ذكر ان الشعب المصرى يحتاج دراسة عشان يعرفوا يتعاملوا معاه وهنا صاحبى اتعصب وبدا صوته يعلى وانا اللى هديته
بس الحقيقة ان العضو استنكر كل الحديث ده من الموجودين وقال ما ينفعش الاسلوب ده احنا بنتعامل بالحسنى لحد ما يتصلحوا ولو ما اتصلحوش احنا نصر على الحسنى والمخالف نعامله بالقانون
-عجبنى فى النقطة دى جدا

ذكر ان عشان فى كلام كتير وان كل الناس عاوزة توقف البلد فكان لازم اعلان موعد الانتخابات عشان الناس تلائى حاجه تشغلها ونسيب الدولة تمشى

فى النهاية شكر العضو الموجودين وخرج ومسك امين الحزب بالمقر المايك وطلب شوية حاجات
اولا النوتة الانتخابية ..كل عضو حزب هياخد نوتة ويحاول يلم ناس وياخد بيانتهم عشان يوم الانتخابات يبقوا حاضرين وبالتالى يعرفوا الحد الادنى من الحضور كام ..وقال ان لو كل واحد جمع 10 اسماء على يوم الانتخابات هيبقى عندهم عدد معقول
ثانيا فى سلع موجودة فى الحزب الاعضاء يشتروها كانت خضروات ورز وده لدعم المقر
اختتم كلامه ان فى تانى يوم فى اجتماع لجماعة الاخوان المسلمين لعرض تاريخها للى حابب يحضر
كان مكان الاجتماع مقرر بس الموجودين غيروه ليكون مقر الحزب
-وهنا يتجلى الفصل بين الحزب والجماعة فى وسط ابتسامتين صفراوتين بينى وبين صاحبى :)

لحد هنا الاجتماع خلص

الناس دى فعلا منظمة..مقر شيك مجلة مكتوبة ونظمة بغض النظر اللى فيها من انجازات صح ولا غلط حاس بيه ولا لا
كله قاعد فى مكانه طريقة الحوار سلسة مفيش تجاوزات كله عارف دوره
بنسمعك وبتعمل الى احنا عاوزينه فى الاخر
لكل واحد دور لازم يعمله وكل واحد لازم يدعم

الناس دى اللى بيغلط فيها بيتحاسب ..ممكن انوه عن العضو ده انه صاحب تصريح عدم موافقة الاخوان على اختيار المجلس العسكرى ل10 فى حكومة الجنزورى ..وقال انا صرحت من غير اذن واتعاقبت وكان لازم اصبر
وكان تعليق احدى السيدات الفاضلات ان ليه لا ما وافقتوش ..قال لاننا محبناش يتلوى دراعنا
-وعنده حق

بس اكبر مشكلة قابلتنى فعلا ان الناس دى ما يعرفوش ان هما اللى بيحكموا..لا اعضاء الحزب ولا كلام العضو الموكر يدل انه عارف ان هو اللى فى ايده القرار..مستنين البلد تتصلح بس مش عارفين ايه المطلوب ..بس هما عندهم صبر


ده الصورة بنسبة 90 % ممكن اكون نسيت بعض التفاصيل الصغير بس اكيد مش بقصد..واسف لو قولت رايى فى النص