الخميس، 30 أغسطس، 2012

رطوش

-شكّاى
-كداب وساعات بيصدق كدبة هو اللى كادبها اصلا
-يخفى ما يحتاجه الاخر ويفشى السر لمن لا يحتاجه
-لازم يبرر
-عايز كل الناس غنية بس بنفس الدرجة ومش بس كده عايز كمان الناس تصرف بنفس الدرجة
-عايز كل واحد يتدين على نفس مستواه لا يزود ولا ينقص
-عادى جدا يحرم حاجه وهو بيعملها وبيلاقى مبرر
-لا يجيد قراءة التاريخ ومش بيتعلم من اخطاء الاخرين ولا اخطاء الماضى
-عواطفه قوية جدا وممشيها بالحب
-مش بيعرف يسوق خالص لانه لو بيعرف يسوق هيعرف ان الطرق اللى ماشى عليها دى مش ادمية اصلا
-بطيء الاشتعال وكسول
-بياخد على اى حاجه يقولها الكبير
انا ساعات بحس انا مصمم يكسر كل حاجه اتعلمه زى مثلا
-من تدخل فيما لا يعنيه سمع ما لم يرضيه
-القناعة كنز لا يفنى
-الدين لله والوطن للجميع
-اعقلها وتوكل
وحاجات تانية كتير اوى 
طبعا انتوا عارفين انا بتكلم عن مين وطبعا المميزات اكتر من العيوب مليون مرة بس شوية الرطوش دى ملهاش اى لازمة..هو ليه كده؟ ممكن يبقى احسن..يا اهل الخير عايزن وزارة تربية وتعليم تصلح شوية الرطوش دى
الموضوع صعب علينا كلنا اننا نغير نفسنا من حاجه اتعودنا عليها من زمان بس يا رب نحاول ويا رب الاجيال اللى طالعة يبقالهم فرصة افضل ان الرطوش دى ما طبقاش موجودة
لان تراكمها بيعطل كتير..واحنا مجربين

الثلاثاء، 14 أغسطس، 2012

كيفية تجنيد الاخوان

طبعا من العنوان معظم الناس هيدخل عشان يعرف اسرار ويعرف المعلومات الخفية عن الجماعة الاكبر فى تحيير الرأى العام فى كل دول العالم.واكيد طبعا فى ناس هتدخل لمجرد انها تثبت انى بفتى وانى مش عارف حاجه بس انا طبعا مش هديلهم الفرصة دى..
فى الحقيقة انا بفكر اجند الاخوان عشان يخرجوا بره الاخوان ..مش الغرض انى اقولك هما بيجندوا الناس ازاى بس انا عايز اخرجهم من البوتقة دى..مش عشان البوتقة وحشة ..بس اهو غلاسة كده 
اول حاجه تعملها لما تشوف واحد اخوانى ما تبينلوش انك متعصب وافضل اضحك حاول تغطى على ضحكته الصفرا اللى راسمها دايما..حاول تعصبه وتخرجه عن شعوره..بالأدب طبعا
حاول تبعد عن اى سكة فيها استدلال بقرآن اوحديث..لو عرف ياخدك لموضوع وفتح باب الدين استشهد بقصص الصحابة والاولياء والأئمة ..
كل كلمة يقولها حاول تغلّطه بيها وتنرفزه وتقوله يعنى انت قصدك كذا..طب وكذا..بس اهم حاجه ما تكونش حاد لانه لو ضحك وابتسم ابتسامته هيغلبك
حاول تقرأ عن سياسات توابع النبى فى ادارة امور الدولة..واول ما يقولك شريعة حاول تربط على طول
وهو بيحاول يقنعك بوجهة نظر سياسية وانت رافضها ما تحاولش تقوله انت رافضها..تعنت فى الرفض وخلاص..على فكرة ده نفس الاسلوب بس هو مش بيغلّس هو بيعد يلف ويدور بيك عشان يقنعك انه صح لحد ما تزهق وترضيه فانا عايزك تبقا صادم وغلس وتقولا لا وخلاص وما تنساش الضحكة طبعا
لو واحد من الاخوان قالك احنا عايزين..قوله احنا مين؟؟ وعرفه ان الاهم بالنسبة ليك اللى انت عايزه ولو كلمك باسم الوطنية اضحك ضحكة هزلية بصوت عالى ومصمص شفايفك..هو هيفهم
حاول تتكلم مع واحد اخوان لواحده واعمل ادامه حاجات يستغربلها اى حاجه غريبة بس مش عيب طبعا..عرفه ان الدنيا حلوة بره الاخوان وان فى ناس زى الفل ..وان مش لازم حد يفكرلنا ..حاول تخليه منحل ويا سلام لو تخليه يعصى الاوامر حاول بكل قوتك انك تجنده انه يخرج من الاخوان..اظن من حقنا ولو مرة واحدة نستخدم اسلوب هما بيستخدموه..لو قالولك احنا طريق الصواب والجنة اضحك لحد ما يتعصبوا وساعتها هياخدوا ذنب ;)
ممكن تخرج اخوانى من الاخوان؟؟ مش عارف ..بس انا ممكن اتكلم عن الاخوان عادى زى ما اتكلمت الوقتى دول قدرنا ومكتوب علينا زى ما هما مكتوب عليهم يشوفوا اللى شبهى طول ما هما عايشين واللى زيى يفضل يكدرهم..مكتوبين لبعض وهنتقابل فى الجنة ان شاء الله
اللى انا معرفش اتكلم عنه هما الفلول لان لكل زاحد فل فى صفحة اجتماعية وثقافية ومعلومة وصلتله بشل ما من مصادر كتير انا مقدرش احاكمه عليها..هما احرار يا عم الحاج وعقلك فى راسك تعرف خلاصك واللى ياكل على درسه ينفع نفسه وكام مثل حلوين كمان

طبعا التدوينة دى غرضها السخرية البحتة ومحاولة لتنشيط الفكر فى كيفية التعامل مع كل ما هو ليس معك 

الأحد، 12 أغسطس، 2012

قتلنا الذكريات

مش فاكر يومها التفاصيل بالظبط,بس فاكر اننا روحنا البحر وقعدنا ,كل واحد كان شايل فى قلبه ذكرى وعايزها تموت,كل واحد كان عايز شريك فى الهم حنين فى اللوم,كان البحر احلى شاهد علينا,قعدنا نحكى ونفضفض ونضحك ونكركر,سرقنا الوقت وقررنا نقوم,سابنا البحر ومرضاش يمنعنا رغم انه لو كان طلب نستنى كنا قضينا معاه كمان يوم, مشينا وروحنا اتعيشنا ,وبعد ما الصبح طلع بشوية كل واحد راح على بيته ومات الكلام .
موتنا الذكريات اللى كانت معذبانا باننا خرجناها من قلوبنا وشغلنا مكانها بذكرى تانية احلى ,هى ذكرى قتل الذكريات الاولانية.
هنفضل طول عمرنا فاكرين اليوم اللى قعدنا فيه وسمينا الصخرة باسمنا....بس عمرنا ما عدناهنفتكر الكلام اللى اتقال يومها بالتفصيل. 

الثلاثاء، 7 أغسطس، 2012

متى سيكون الحساب

كثيرا ما اردت انشاء مدونة خاصة لكتابة ما يدور حولي وكيف ارى الاشياء من وجهة نظري.خصوصا وانى مهتم بالتحليلات الاجتماعية لكثير من الاحداث ,ولكن بعد حادث امس والهجوم الارهابي على جنودنا على الحدود المصرية اردت ان اسجل بعد الامور واسأل بعض الاسئلة التي اتمنى ان يكون لها اجابة..
قمنا بثورة ادت الى تنحى مبارك عن الحكم وجاء المجلس العسكري ليحكم البلاد,جاء بصفة غير دستورية او قانونية لكن رضا الشعب كان لمجرد ان يتم ازالة مبارك ,قام المجلس بعمل استفتاء على تعديل لمواد دستور 71 وجاءت نتيجة التصويت بنعم وذلك لان البعض رأى ان هذا اقصر طريق لتسليم السلطة والبعض الاخر رأى ان هذا اقصر طريق للوصول للسلطة وهناك ايضا من قال نعم لمنع اخرين من الوصول للسلطة,عشنا ضرب لنتيجة الاستفتاء عرض الحائط ودخول المجلس العسكري فى نزاعات سياسية مدنية لا دخل له بها وفى اخر الاحداث جاء مرسى بصندوق انتخاب,عملية نظيفة لكن ناقصة الديمقراطية بالطبع,ترضيني العملية بشكل شخصي كأول عملية انتخابية فى مصر ولكن لا بد من تدارك الأخطاء.
الان الى الموضوع الاهم,بعد مرسى سيأتي رئيس اخر وبعده سيأتي اخر ومن المفروض ان يتم تداول لسلطة والحكم لافراد مدنيين وسيأتي ايضا برلمان مدنى وسيتغير اعضاؤه من حين الى اخر.السؤال هنا كيف لجهات لا تتغير الزج بنفسها داخل هذا الصراع المدني السياسى؟؟
المجلس العسكري وجميع ضباط الجيش المصري هم خدام لهذا الوطن بغض النظر عن من يحكم .كذلك الجهات الامنية كافة كالداخلية سواء شرطة او امن وطني او كالمخابرات سواء عسكرية او مدنية او جهاز الامن القومي..هم يقومون بعملهم ولا يهمهم النزاعات السياسية الاخرى..وكذلك القضاء ولكن هذا ليس موضوعنا الان.
بعد حادث رفح ونحن الان على اعتاب دستور جديد,كل ما اريده فى هذا الوطن هو معرفة كيف يكون الحساب.كيف احاسب اشخاص يتقادون اجوروهم وهم لا لا يعملون؟؟ ومن تغاضى عن تكاسعهم؟؟
كنت اتمنى ان تخرج علينا المخابرات العامة بورقة يقال فيها انه تم تبليغ الجهة المسؤولة ..والجهة المسؤولة تخرج بورقة تقول اننا ارسلنا اوامرنا لهذا وذاك..ونظل نتتبع الاوامر حتى نجد التقصير كان اين ..هناك ارواح زهقت نتيجة تقاعس البعض من جهة ونتيجة الزج السياسى لجهات امنية من جهة اخرى..اتمنى ان يكون هناك مركز اعلامى للمخابرات تطلعنا على ما تم على الاقل كى يساعدنا هذا فى اختيار من يحكم,فلو فرضنا انه تم ابلاغ مرسى ولم يتحرك علينا ان نعرف .ولكنى اعلم ان ما حدث هو تقصير مخابراتى جسيم لا يغتفر.
من جهة اخرى .ما نفعله اليوم من القاء التهم على كل من حماس او اسرائيل ..ما هو الا تضليل وتعتيم عن كم الفشل الذى وصلنا اليه على المستوى الامنى ..من قام بالعملية ارهابيين سواء موجهين من جهات عربية وهذا صعب فى الوقت الحالى او موجهين من الموساد وحتى ان صح الافتراض الثانى فهذا لا يعفينا من الخطأ والتقصير
ولماذا يرى الناس المحاسبة على نوع من الاعدام..من الوارد ان يقصر او يفشل اى شخص فى اى عمل مهما كان..المهم ان ناتى بمن هو احسن ومن فشل لديه مجالات اخرى ومناصب اخرى يتولاها بعيدا عما فشل فيه..
من النقاط الاخرى التى سمعت من حولى يتحدثون عنها هى ان التكاعس العسكرى جاء ليغرق الاخوان . او ان هناك من فعل ذلك ليغرق المجلس العسكرى او ان هناك من اتفق مع اسرائيل..او ان هناك من يريد التلفيق لمرسى لانه المسؤول الاول عن البلاد وهو مقصر ولا بد ان ينزاح..انا لا ادخل القضايا هناك قضايا سياسية وهناك قضايا امنية ..اريد المقصر حتى ولو من باب الاطلاع..
جنودنا قابلوا ربهم وتركوا لنا الدنيا نشقى فيها من اجل معرفة ولو حقيقة واحدة